紅軍乘勝再尼料

猪拉多纳

利物浦今晚主場對般尼，佢哋剛喺主場勇挫曼城，爭入前四機會大增，如果今晚對護級分子失分，上場努力便會白費。般尼今季作客曾經打和車仔、曼城，反而會令紅軍更小心，波童捧讓球主勝。

（now 625周四凌晨4時直播）
般尼作客屢被炒

般尼今季聯賽作客車路士、曼城都曾經喺落後情況下逼和對手，打下風波唔可以睇小，不過正所謂前車可鑑，相信紅軍領隊羅渣士會叮囑球員唔可以大意。事實上，紅軍雖然喺聯賽保持連續十一場不敗，但每場贏波過程都絕不輕鬆，球員根本冇資格講留力。難得啱啱喺聯賽擊敗勁敵曼城勢頭咁好，而且連續兩場比賽都喺主場出戰，唔使舟車勞頓，當然希望乘勝追擊，繼續向來屆歐聯入場券目標邁進。

般尼今季作客一係唔輸，一輸通常輸多過兩粒，佢哋連盃賽在內最近七次作客輸波，有六次都係淨輸兩球或以上，既然睇好利物浦可以全取三分，可博主隊大炒對手開讓球主勝。