潛艇焗攻 巴塞玩大佢

猪拉多纳

今晚西班牙盃四強次回合上演激戰，巴塞作客硬撼維拉利爾，由於「黃色潛水艇」首回合落後兩粒，為收復失地勢必一開波搶攻，但巴塞向來最怕你唔攻，你一谷晒上前，就啱晒佢哋打反擊；王牌美斯啱啱躋身五大聯賽歷史射手榜Top10，火花四濺隨時合演入球騷，大盤好路。

（now 632周四凌晨3時直播）

維拉利爾絕非善男信女，唔單止穩佔中上游及於歐霸殺入十六強，日前聯賽作客更逼和「銀河艦隊」皇馬，令士氣大振。呢艘「黃色潛水艇」中前場勁多法寶，無論係巴塞棄將杜斯山度士兄弟、皇馬借將卓利舒夫、老江湖箭頭烏捷抑或阿根廷新星韋圖，個個都有一定質素；尤其係韋圖，呢位新紮師兄今季齋計聯賽就入咗十一粒，上仗對皇馬更先任後備，去到下半場中段落後嗰陣先換佢出嚟，擺明留力砌巴塞。由於維拉利爾首回合輸1比3，只要今仗贏2比0就可晉級，仲唔藉地利豁出去搶攻咩？
MSN組合呢期弗爆

巴塞進攻有幾勁唔使多講，「MSN」鋒線美斯、蘇亞雷斯同尼馬愈來愈夾，美斯日前對CF格蘭納達取得個人在西甲嘅第二百六十九個士哥，令佢躋身五大聯賽歷史射手榜前十名，前面有英格蘭名宿舒利亞、死敵C朗、「轟炸機」梅拿等，真係弗到冇朋友。巴塞距離決賽只有一步之遙，當然唔會揸流攤，必趁「黃色潛水艇」大舉反撲暴露更多空位，交晒畀「MSN」狂打反擊，你一拳我一腳，入波唔會少，一於捧有1.5倍嘅大盤。