紅魔打鵲搵到食

猪拉多纳

朗尼歸位生晒

開講有話因禍得福，曼聯箭頭法卡奧同尹佩斯，雖然一個表現低迷、一個腳踝受傷，但係「魔童」朗尼就因此「受惠」，踢番自己最煞食嘅前鋒位置，仲頻頻入波盡顯射手本色，佢哋今晚英超快車造訪「喜鵲」紐卡素，就算缺少「打鵲高手」尹佩斯都冇有怕，簡單捧「紅魔」1.77倍客勝。

（now624台周四凌晨3:45直播）

曼聯現時排喺聯賽榜第4位，受到阿仙奴同利物浦「前後夾擊」，為咗爭到張歐聯入場券，嚟緊根本冇失分空間，就算踢埋今場就要喺足總盃8強硬撼「兵工廠」，相信教頭尹戈爾都會派強陣出擊，以贏波袋晒3分為目標。
紐卡素欺善怕惡

尹佩斯近9次英超擔正鬥「喜鵲」斬獲7球，名副其實係「打鵲高手」，雖然佢今場要養傷，但都唔使驚曼聯火力唔夠喎，事關「受惠」尹佩斯打柴同法卡奧低迷再次喺前線孭飛嘅朗尼，踢番前鋒即刻生晒，繼上圈足總盃攻破普雷斯頓大門後，上場聯賽鬥新特蘭更梅開二度，超越林柏特成為英超史上首名連續11季入球達雙位數嘅球員，今場有朗尼壓陣，邊使怕曼聯冇波入！

至於主場出擊嘅紐卡素，新帥卡華上輪領軍迎戰阿士東維拉，靠首席射手柏比斯施斯一箭定江山，終於取得接掌帥印後首次主場勝仗。但其實維拉踢呢場之前，已經連續11場英超未贏過，仲要連輸咗6場，「喜鵲」即使贏波都顯然爭啲說服力。

再講吖，「喜鵲」喺卡華接手後變成「欺善怕惡」嘅弱雞，對住史篤城、侯城同般尼等中下游全部有分落袋，但撞着前列嘅車路士、曼城同修咸頓，就統統扯白旗投降輸波，平均每場失夠3球，今場加埋中場核心哥爾碧克坐波監，就算主場出戰都難擋「四哥」曼聯，揀客勝啱數！
盤路解碼

曼聯作客連開8口「半場和」，其中包括6次「0:0」及2次「1:1」。
Data King：紐記迎戰曼聯「大」煲

‧雙方近26次碰頭，曼聯錄得19勝5和2負佳績。

‧曼聯近12次作客喜鵲斬獲32球，平均每場取得2.67球。

‧以2.5球中位數計，曼聯近12度造訪喜鵲開出10次入球大。