FC廣州破浪唔客氣

猪拉多纳

「冠軍復仇戰」爆發

亞冠盃H組今日有場「冠軍復仇戰」，由前屆盟主廣州恒大淘寶（足智彩譯FC廣州）客場挑戰上屆冠軍西悉尼流浪者，恒大舊年就係响8強畀流浪者淘汰衞冕失敗，今場有仇報仇，1.7倍客W值得一試。

（now670台周三下午4:30直播）

舊年恒大首回合作客西悉尼場波輸咗0:1，仲因為唔滿意球證偏幫，搞到連主帥納比都走入球場抗議，結果佢老人家事後畀亞洲足協罰停賽，最慘係次回合恒大主場只贏2:1，失咗個作客入球畀流浪者被踢出局，所以今次恒大張宣傳海報，都用自我救贖做主題，由鄭智拉番起舊年跌倒嘅自己，好有決心報番一箭之仇。
森巴三叉戟火力猛

今年恒大喺休季期間重金換血，買入高拉特、阿倫呢啲貴價巴西援兵，全面取代意大利外援，季前表現令人眼前一亮，由艾傑臣、高拉特、阿倫組成嘅「森巴三叉戟」，唔單只攻擊力強，仲比意大利兵擅打硬仗，經過中超盃同一場亞冠盃磨合，呢個身價高達二億人民幣嘅三叉戟，被認為係復仇嘅最大本錢。當然，恒大唔係冇隱憂，左閘李學鵬傷咗，代替佢嘅鄒正雖然勇悍，但係容易衝動犯規，想減輕後防壓力，就只有靠以攻代守咯。
西悉尼流浪者殘殘哋

主隊西悉尼流浪者唔似得恒大咁豪，而且佢哋今季响澳職表現奇曳，家陣只得8分包緊尾，但係呢班波打亞冠特別醒神，上場作客鹿島鹿角即使收起5件兵，留力早兩日嗰場悉尼打吡，一樣反勝咗鹿角3:1。無疑搏完對FC悉尼之後，流浪者班人殘殘哋，但係件長期傷兵基林布魯特都已經復出埋，對FC悉尼仲有波入，佢哋有本錢同恒大對攻，不過咁其實對恒大嚟講未必係壞事，流浪者肯出嚟攻，個「森巴三叉戟」仲多發揮空間，贏波報仇成功機會仲大，所以除咗博客勝，1.92倍入球大都可以考慮。
周三賽制

亞洲聯賽冠軍盃、南美自由盃賽制：兩項賽事均為分組賽階段，32隊分8組，每組4隊進行雙循環比賽，每組首名及次名晉級16強。

法國足總盃賽制：今輪為8強，法定時間內打和將加時30分鐘，未分勝負則互射12碼決勝。

意大利盃賽制：採主客兩回合制，今輪為4強首回合。兩回合計打和，計算作客入球優惠，未分勝負將於次回合法定時間後加時30分鐘，加時仍計作客入球優惠，再和則互射12碼決勝。

中北美洲冠軍盃賽制：採主客兩回合制，今輪為8強次回合。兩回合計打和，計算作客入球優惠，未分勝負將於次回合法定時間後加時30分鐘，加時階段不計作客入球優惠，再和即互射12碼決勝。