士砵亭費倫撐得過

猪拉多纳

英超「廢翼」誓打爭氣波

英超廢棄「飛翼」火鳳重生，拿尼同穆罕默德沙拿，兩位唔同時期登陸英超豪門嘅翼鋒，曾被冠以「C朗二世」同「埃及美斯」嘅名號，但卻落得同一下場，今季被外借流放。由天堂跌落凡間，不過並冇打沉二人嘅意志，兩人默默起革命，踢出一場又一場精彩大反擊，今晚盃賽分途出擊，齊展翅高飛爭標。
回勇拿尼誓斬國民

拿尼試過紀律欠佳，比賽時犯錯，飽受球迷唾罵，被主帥冷落，最終今季被外借返母會士砵亭。呢位28歲葡萄牙國腳由新星變殘兵，好大程度上因為長期活喺C朗影子之下，07年加盟曼聯，已被輿論攞來同C朗比較，甚至有「C朗二世」之稱。二人級數始終有距離，要拿尼交出C朗水準，實在太苛求。拿尼返回士砵亭反而壓力大減，今季喺葡超連同歐洲賽已轟入8球，並協助士砵亭進身葡盃4強，今晚首回合作客國民隊。拿尼唔止要為士砵亭打破7年錦標荒，更要證明自己值得佔紅魔一席位。

（有線155台周五凌晨4時15分直播）

至於穆罕默德沙拿上屆歐聯分組賽，為巴素利兩次射爆車路士，上「車」後卻長坐冷板，似係被莫連奴「報復」。1月更恥辱性成為車仔收購古達度嘅交易「附屬品」，外借到費倫天拿。古達度為車仔上陣5次碌碌無為，但沙拿仔近5仗已為費倫轟入4球，兼打入歐霸盃16強，被選為今季意甲冬季最佳引援，摑咗「寸王」幾巴。
弗爆沙拿唔赦祖記

費倫天拿今晚意大利盃4強首回合作客祖雲達斯，成為穆罕默德沙拿登陸意甲後最大考驗，亦係表現身價好機會，力爭再獲「士哥」，話畀世人知「埃及美斯」並非浪得虛名。

（now 633周五凌晨3時45分直播）