三強鼎立新制更精彩

猪拉多纳

新一季日職聽日開鑼

新一季日職明午開鑼，今屆賽事最大特色係轉制，由過去十年採用嘅主流聯賽雙循環制，還原用番兩階段制，三月至六月進行第一階段賽事，七月至十一月底進行第二階段賽事，兩階段賽事之後設冠軍賽，第一階段榜首球隊、第二階段榜首球隊、與全年總成績第二及第三的球隊進行淘汰賽，勝出的一隊將於十二月一及五日，同兩階段總得分最高球隊，透過主客兩回合賽事決出今屆日職總冠軍，日職列強實力本來就相當接近，新制將令賽事變數更大，競爭更緊湊可觀。
紅鑽擴軍挑戰飛腳

今季日職基本上係大阪飛腳、浦和紅鑽同鹿島鹿角三強鼎立，上季三冠王大阪飛腳擁有遠藤保仁、今野泰幸同岩下敬輔等沙場老將領軍，加上一對極銳利箭頭宇佐美貴史同安達臣柏德列喺前線取分，戰鬥力強橫，又補入咗上季仙台維加泰首席射手赤嶺真吾同橫濱水手中場小椋祥平，依然有力擺下擂台打衞冕戰，球隊最大優勢係人腳變動少，季初可早着先鞭。飛腳啱啱捧走日超盃，雖然佢哋喺亞冠盃兩戰皆北前景唔樂觀，但對於呢支後備兵源較弱嘅勁旅嚟講，反而可以更專注國內賽事。

飛腳最大勁敵首推浦和紅鑽，呢支近兩季晚節不保傳統勁旅痛定思痛，季前大事擴軍，一口氣引入咗大宮松鼠前鋒隆比真歷、武藤雄樹、廣島三箭射手石原直樹、清水心跳翼鋒高木俊幸同柏雷素爾守將橋本和，令原本已經相當平均嘅陣容更為鼎盛。而且新制對佢哋有利，因為新兵需要時間磨合，比賽分兩階段進行，令兵源充裕嘅紅鑽更有機會後來居上，挑戰錦標。
鹿角新星屆收成期

至於第三勢力落喺鹿島鹿角身上，呢支日職史上最成功球隊，近季集中精力搞好青訓，新人輩出，如今已屆收成期，陣中包括柴崎岳、土居聖真、昌子源等年紀輕輕已擔綱主力，其餘新星赤崎秀平、中村充孝同豊川雄太亦進步一日千里，呢批小將預期喺新球季會更進一步。

雖然冠軍預期不出三隊，不過每季日職都會有一鳴驚人球隊，一如上季嘅鳥棲砂岩，新一季不必踢亞洲賽嘅廣島三箭、換帥擴軍嘅神戶勝利船同強勢回歸日職嘅湘南比馬都充滿潛力，隨時帶畀大家更多驚喜。
日職首周賽程

周六1:00pm：大阪飛腳 Vs ＦＣ東京

周六1:00pm：名古屋鯨魚 Vs 松本山雅

周六1:00pm：鳥棲砂岩 Vs 新潟天鵝

周六1:00pm：廣島三箭 Vs 甲府風林

周六1:00pm：仙台維加泰 Vs 山形山神

周六2:00pm：橫濱水手 Vs 川崎前鋒

周六3:00pm：神戶勝利船 Vs 柏雷素爾

周六6:00pm：湘南比馬 Vs 浦和紅鑽

周日12:00nn：清水心跳 Vs 鹿島鹿角