飛腳有後勁揭幕戰要吼實

猪拉多纳

隨住上周飛腳擊敗紅鑽勇奪日超盃，亦為今季日職揭開序幕，兩軍於開鑼日分途出擊。上季盟主飛腳坐鎮主場迎戰FC東京，前者保留宇佐美貴史及安達臣柏德列等前場猛將，火力之強唔使懷疑，不過佢哋周中去到南韓出戰亞冠分組賽，舟車勞頓未有咁快回到氣。

FC東京以逸待勞或可於初段頂得兩嘴，好彩飛腳後勁凌厲，經常喺下半場嚟料，睇番佢哋上季最尾九場聯賽，有八場上半場打和嘅膠着情況下，最終靠易邊後發力有五場全取三分，如果今仗上半場打和，可以喺半場休息時投X主勝。

（有線61及201台周六下午1時直播）
紅鑽搶韁吼「下一隊入波」

至於上季亞軍紅鑽則於同日守尾門，作客出戰「升降機」湘南比馬；紅鑽季前從降班嘅大宮松鼠手上斟得射手隆比真歷，實力理應有增無減，可惜之前於亞冠盃分組賽頭兩輪及日超盃均輸波收場，睇嚟呢支日職紅魔仍未操起。好彩紅鑽係比馬剋星，唔單止近五次正面交鋒，錄得四勝一和佳績，擺明食住對手，而且每次都係入波先，連同上季三十四場聯賽有二十四仗先開紀錄，踢法堅搶韁。考慮到紅纘近況麻麻，直播嗰陣可以睇定嚟玩，若果紅鑽演出對辦的話，臨場博佢哋「下一隊入波」。

（有線61及201台周六晚6時直播）