西意法Goal手大挑戰

猪拉多纳

西、意、法射手階級大激鬥，華歷簡奴「無名小子」貝爾奴人氣爆升，大膽要同巴塞球王美斯爭鋒。費蘭度托利斯及尼格度同是天涯淪落人，返回西甲後碰面，鬥頹定鬥翻身？到時自有分曉。意甲莫路伊卡迪大勇，趁勢想搶希古恩喺阿根廷國家隊位置，法甲老將巴里奧斯單挑新星拿卡錫迪，各自各精彩。
巴塞華歷簡奴駁火
貝爾奴上位 美斯拒失威

西甲巴塞隆拿主場對華歷簡奴，焦點人物反而係華歷簡奴前鋒貝爾奴，佢上仗轟入4球，成為球隊史上首位食出「大四喜」球員，兼當選西甲2月最佳球員，風頭勁過美斯。至於身為西甲「入球王」嘅美斯，今仗當然要還以顏色，全力數胡顯身價，大細中位數3.5球，照要大盤。

（now 632周日晚7時直播）

26歲嘅貝爾奴上仗僅用16分鐘，就入咗4球，助球隊贏利雲特4比2，值得一提係佢用齊左、右及頭槌入波，達成「完美帽子戲法」，對上1位做到呢個壯舉係皇馬快翼加里夫巴利，足見貝爾奴級數十足。貝爾奴為西班牙土炮爭番一口氣，備受國內球迷熱捧，更獲賽會頒發2月最佳球員殊榮，以作鼓勵。今季已有12球進帳嘅貝爾奴，遇上巨星美斯，更加要使出渾身解數爭取入波，證明本土球員一樣掂，以答謝各界支持。
蘇亞雷斯全面復甦

美斯今季各項賽事已轟入38球及19次助攻，被譽為職業生涯表現最全面嘅時期，華歷簡奴防線好難招架。雖然尼馬停賽，但蘇亞雷斯大勇，連盃賽在內近3仗入4球，有番効力利物浦時期水準，即使「MSN」組合冇咗「N」，無損火力。巴塞上季主場贈華歷簡奴6蛋，可望再演入球騷。