紅魔爆廠雪10年舊恨

猪拉多纳

未贏過嘅獎牌 朗尼恨到發燒

今晚英格蘭足總盃8強壓軸重頭戲，由曼聯主場火併老對手阿仙奴，紅魔隊長朗尼職業生涯捧盃無數，惟獨欠一面足總盃冠軍獎牌，今年難得車仔曼城早早出局，令佢圓夢機會大增，今仗必定搏盡求入4強，並一雪10年前決賽失盃之辱，由於近年兩軍交手紅魔都食住兵工廠，加埋主場之利，小讓平半有買趁早。

(now 621及633周二凌晨3時45分直播)
戰意爆棚 卡域克復出

出身於愛華頓嘅朗尼，9歲嗰陣睇住「拖肥糖」喺95年擊敗曼聯勇奪足總盃，已經立志大個仔之後要捧走呢隻歷史悠久嘅獎盃，04年佢轉投紅魔後曾兩度殺入足總盃決賽，但都與冠軍擦身而過。其中05年嘅決賽攻足阿仙奴120分鐘都冇入波，最終互射12碼失落冠軍，對此「魔童」至今依然耿耿於懷。儘管先後染指聯賽、歐聯、世冠盃、聯賽盃等錦標，但朗尼嘅獎品櫃始終欠缺一面足總盃金牌，難怪佢恨到發晒燒，賽前仲話好想砌低阿仙奴，決心十足。

曼聯對上一次贏足總盃已經係11年嘅事，依家全隊除咗尹佩斯（2005阿仙奴）同桑馬達（2012車路士）喺入魔前捧過外，其他球員從未染指呢項錦標，更何況紅魔今季只餘呢隻盃可爭，故爭勝飢渴感強烈。甩漏多多嘅中堅莊尼伊雲斯因上仗吐口水被罰停賽6場，反而成為後防變穩嘅轉捩點，而傷咗一排嘅卡域克今仗有望復出中場坐鎮做串連，預計會令轉守為攻更暢順。
近年對戰 食住阿仙奴

至於衞冕嘅阿仙奴有新加盟嘅守將基比爾包列斯達因傷抖3周，主帥雲格喺足總盃習慣起用「神經刀」施捷斯尼，但呢位淪為後備嘅門神成日蝦碌兼有微傷，連同轉身極慢嘅中堅梅迪薩卡，若果大軍谷得太前，隨時畀曼聯以朗尼同迪馬利亞為首嘅快速反擊玩謝。加上紅魔近10次對阿仙奴只嘗1敗，當中更贏咗7場，齋計主場更係5戰全勝，包括2011年同樣喺足總盃8強淨勝兩粒，朗尼嗰場都有士哥，擺明格食格，今仗曼聯小讓平半有2.03倍，呢個上盤真係有計。