地獄奧脫福！紅魔劏小兵

猪拉多纳

足總盃8強重頭戲

今晚有英格蘭足總盃8強重頭戲陪你，曼聯喺主場對阿仙奴，讓平半照捧上盤。近年「紅魔」喺奧脫福慣性玩殘「小兵」，上季連「天才」莫耶斯都贏到波，證明曼聯食得住阿仙奴嘅無限搓波戰術，照計尹戈爾唔會打爛個招牌啩？博主勝啦！

（now621及633台周二凌晨3:45直播）
近10次主場對賽 豪取9勝1和

上季曼聯喺聯賽主場以1:0砌低阿仙奴，連莫耶斯領軍都贏到，可想而知，「紅魔」班球員喺主場招呼「兵工廠」踢得特別有信心。事實上，曼聯近10次喺奧脫福對阿仙奴有9勝1和，加上今季佢哋靠「地獄主場」搵食，梗係要把握機會贏波入4強啦！

或者你會話，今季曼聯由新領隊尹戈爾執教，成班超級巨星只係踢出蔗渣味道，但我反而覺得，依家嘅「紅魔」放棄華麗進攻戰術，踢得更直接反而更易攞阿仙奴命，好似今季聯賽首循環咁，「兵工廠」主場狂攻、搓來搓去有乜用先？最後咪又係畀「紅魔」贏2:0搞掂。

阿仙奴上星期喺聯賽作客以2:1打沉昆士柏流浪，近6戰5勝1負，艾朗藍斯又以後備身份登場，表面睇成隊波好似好弗咁，只不過，歇冬期間加盟嘅中堅基比爾包列斯達對昆士柏重傷，可能會打窒佢哋條氣，畢竟「兵工廠」近7場得2次保持清白身，條防線咁唔穩陣，係咪咁靠得住先？
包列斯達重創 A山放風想走人

最令人擔心嘅，係季初踢到曉飛嘅阿歷斯山齊士，經過近期腳風回落後，上星期突然喺Instagram疑似吐苦水，上載佢喺巴塞隆拿健身室同隊友嘅合照，暗示掛住喺西甲踢波嘅日子，擺明覺得喺阿仙奴唔開心，如果連佢都冇心機踢，阿仙奴想贏都真係幾難。
Data King：紅魔連開4口半場和

‧紅魔今季主場出擊，錄12勝1和1負。

‧曼聯連續4場開半場和。

‧曼聯近8戰有4次單場攻入3球。

‧阿仙奴近12仗有11次半場保住不失。
英格蘭足總盃賽制

今輪為8強賽事，法定時間內打和即擇日重賽。
盤路解碼

曼聯近7次主場賽事，有6鋪開「讓主」。