流浪者 勝利做大騷

猪拉多纳

壯行色Vs爭榜首

今日晏晝澳職獨腳戲，又係西悉尼流浪者擔大旗，坐鎮主場迎戰墨爾本勝利，這是西悉尼流浪者3日內第2場聯賽，認真頻密，不過該隊上仗末段反勝令士氣大振，況且墨爾本勝利亦慣咗有前冇後、打死罷就，雙方勢必合演入球騷娛賓，斯維力撐大盤。

（有線64及203台周五下午4時40分直播）

西悉尼流浪者今季聯賽成績一落千丈，踢咗19場波竟輸咗12仗，淪為尾二，這與兼顧上屆亞冠不無關係，最終捧盃而回，仲有得踢世冠盃，乜都抵番晒喇！

但話咁快今屆亞冠分組賽亦展開，嚟緊下周中要打第3輪作客FC首爾，趁住今周空檔，佢哋先於周三補賽對墨爾本城，喺兩度落後之下，最終靠路卡維斯亞尾段入波反勝3比2，係就係攰啲，但呢場得來不易嘅勝仗令軍心大振，佢哋一定想食住個勢，對住另一墨爾本球隊──墨爾本勝利再斬多四両，為出征亞冠前壯行色。
客軍擁澳職最強火力

當然五哥墨爾本勝利亦非善男信女，該隊以巴巴路西斯、貝利沙、賓卡法拿為首，配合古希美嘅後上入楔嘅攻擊線，鑄造澳職最強火力，其中巴巴路西斯近5仗轟入4球，腳風順到冇朋友，其有前冇後打法，難免令後防暴露更多空位，因此入得又失得娛樂性甚高。

何況墨爾本勝利今仗若擸晒3分，就會升上榜首，預計佢哋面對匆匆再戰嘅西悉尼流浪者，照樣好「大」喜「攻」。既然大家都有心搶攻爭勝，勢必製造大量入球，與其估邊隊會贏波，斯維寧願捧有1.72倍嘅大盤好過，隨時半場就收錢。