6弱今夜互片逃離跌錢漩渦

猪拉多纳

英超席位價值連城，特別係電視轉播費貴到拆天，若果一個唔小心降班嘅話，每隊會損失至少5,000萬鎊（約5.9億港元）。目前深陷降班漩渦嘅昆士柏流浪、李斯特城、侯城、新特蘭、阿士東維拉，連同仲未上岸嘅水晶宮，今晚會捉對廝殺，為咗搶分護級，擺脫呢個「跌錢漩渦」兼拖對方落水，佢哋必定搏甩髀掙扎求存，隨時好睇過榜首大戰。
水晶宮浸瓜QPR

換帥後有起色嘅水晶宮，今晚早場倫敦打吡坐鎮主場火併尾三嘅昆士柏流浪（QPR）。水晶宮經過一輪衝刺已升上第12位，但仍未上岸，今仗有射手格連梅利刑滿復出，火力大增，面對護級對手、排緊尾3（18位）嘅QPR梗係要趁機踩多腳，主勝不容錯過。

（now 621周六晚8時45分直播）
傳9.2億賣畀76人班主

水晶宮上年年尾仲水深火熱，衰到試過14仗僅得1勝，好彩佢哋寧願賠錢都要搵紐卡素領隊柏杜執教，呢個「白頭佬」做球員嗰陣曾効力水晶宮，對呢支倫敦球會有深厚感情，今次回巢同Hea住教「喜鵲」嘅心態截然不同。柏帥領軍打咗8場波，取得4勝1和3負共搶13分，睇得出佢短時間內讓眾將重拾信心，加上今仗賽前傳出球隊賣盤好事近，會方已同NBA球隊費城76人班主哈里斯傾緊收購，據悉，哈里斯出價8,000萬鎊（約9.2億港元），有望於未來幾個月內成事，對球員士氣亦有好嘅影響。

同樣係換帥，QPR自2月初提拔基斯藍斯接替「腳痛」離職嘅老帥夏利列納後，5場輸咗4場，士氣低落，睇唔出基斯藍斯有乜計仔可令QPR起死回生，作客對住仍未上岸水晶宮難有運行，主勝值得捧場。