車仔用錯火自食其果

猪拉多纳

戰場球場上最忌的是甚麼將？唔係叛將或勁將，而係棄將，有時你所放棄嘅球員或統帥，若果獲得倒戈機會，往往就會一鼓作氣打冧你，今周先有阿仙奴前鋒韋碧克喺足總盃8強一腳射死母會曼聯，之後歐聯嘅巴黎聖日耳門中堅大衞雷斯亦用入波斬殺舊東家車路士。老實講，吸取上屆8強被車仔淘汰嘅教訓，聖日耳門今屆知恥近乎勇，雖然車仔主帥莫連奴已做足工夫，無論係足總盃出局獲得較多時間休息，抑或賽前話聖日耳門踢法「那渣」，早早向球證洗腦，令伊巴謙莫域一次五五波攔截中領紅收場，可惜車仔球員執行力未達莫帥嘅部署，並錯將集中力擺晒喺挑釁對方，而唔係專心踢好場波嗰度，最終喺大好形勢之下出局，可謂自食其果。
倫敦打吡撐「廠」

言歸正傳，今晚英超倫敦打吡阿仙奴主場對韋斯咸，就算下周中有歐聯後顧，Peter仍相信兵工廠勝望甚濃，至於「雙城會」李斯特城主場火併侯城，預計好難分出高下，和波機會好高。
金句：戰場球場上最忌的是甚麼將？棄將也！