再臨福地史浩克恰哈化

猪拉多纳

德甲四支參戰歐聯球隊中，史浩克04首支出局，不過贏得嘅掌聲比大勝薩克達七球嘅拜仁更多，作客巴拿貝贏皇馬大大提升咗全隊嘅信心，更被德國媒體讚譽為德國足球嘅驕傲，球隊目前可以專注聯賽爭前四，士氣如虹，今晚作客福地首都柏林，面對「私房菜」哈化信心十足，平手盤當然要撐史浩克。

（有線64及203台周六晚10時30分直播）

作客以4比3擊敗皇家馬德里雖然未能扭轉出局命運，但係對球隊士氣帶嚟極大鼓舞，教練迪馬堤奧嘅工作得到一致讚揚，球隊賽後立即買斷曼城借將中堅拿斯達錫，球隊得着不只於此，王牌射手亨特拉爾喺舊主地頭梅開二度乜都返晒嚟，但最重要係一批小將光芒四射，兩位95年出生嘅小將麥斯美亞同哥列斯卡搞到皇馬一批大牌守將手忙腳亂，比佢兩個更年輕嘅新秀利萊辛尼仲入埋波添！呢批生力軍至係史浩克挑戰未來嘅珍貴資源，相信喺跟住落嚟嘅比賽會得到更多表演機會。
近12對賽11勝一和

史浩克如今可以專注聯賽，今晚仲作客福地，喜逢「私房菜」哈化柏林，球隊自07年至今同哈化交手過12次，取得11勝一和佳績，近七次對賽全勝，近四戰每仗最少贏兩粒，近三次到訪柏林都贏波而回，更添眾將爭勝信心。

哈化換帥後表現依然平庸，歇冬後七戰四敗，近八戰有五場冇波入，合共只入四球，上輪同史特加合演本季其中一場最低水準悶戰，今晚首席射手舒希巴因傷缺陣，面對剋星無論質態都輸，好難打破近季宿命。