C朗 寸王今夜博反彈

猪拉多纳

莫連奴、C朗由神人變凡人，呢兩位葡萄牙神級將帥近排同受重挫！一向運籌帷幄嘅莫帥竟然「燒鬚」，睇住車路士喺歐聯大好形勢下被巴黎聖日耳門淘汰，堂堂「寸王」淪為「被寸王」，遭冷嘲熱諷。至於金球獎得主C朗變成「無準射手」，搞到皇馬喺西甲及歐聯連吃悶棍，甚至有3成球迷要求棄用C朗。兩位球壇巨人今晚於英超及西甲分途出擊，到底會係反彈定係反艇呢？大家睇住今晚呀！
車仔頹爆 搞唔掂修咸頓

車仔喺歐聯16強搏足120分鐘出局，打擊士氣之餘，亦消耗大量體力，球員身心俱疲，正處於最脆弱時候。反觀「聖人」修咸頓抖咗11日，期間拉隊去瑞士阿爾卑斯山滑雪度假，將士叉足電，正好趁機放乾疲兵車仔。讓球盤修咸頓受讓一球，下盤抵玩。

（now621周日晚9時30分直播）
歐聯出局 士氣重創

「歐聯後遺症」一向係豪門嘅大敵，因為球員始終係血肉之軀，一周雙賽本身已經好吃力，更何況係歐聯惡鬥更加難頂。車路士早前歐聯16強首回合作客聖日耳門後，緊接英超對般尼都贏唔到，已響起警號。次回合搏得更殘，仲要悲情出局，士氣重創，令今場失分機會更高。

唔好忘記，車仔已有英聯盃落袋，加上英超亦領先次席曼城5分兼踢少1場，球員心理上有所放鬆抖一抖氣，亦好正常，爭勝嘅飢渴感或會下降。事實上車仔近兩個月表現毫無霸氣，近11場比賽僅4勝，贏波率僅36%，當中只有一場淨贏兩球。足智彩開讓球盤車仔讓一球，贏盤嘅機會低，從投X角度分析一定捧對家。
瑞士度完假 受讓有計

至於修咸頓雖然近績麻麻，但由於球隊唔使應付盃賽，騰空11日時間畀領隊朗奴高文及球員喘息，檢討及改善問題。球隊仲趁機去瑞士阿爾卑斯山度假，起碼可以減輕身心疲勞，點都有着數。修咸頓話晒仲有機會爭聯賽前4進軍歐聯，絕對唔會放過搶分機會。「聖人」首循環同車仔打和1比1，表現唔輸蝕，何況今場受讓一球，輸一粒唔使輸錢，相當值博。