雷丁抖足W得是福

猪拉多纳

今晚英格蘭足總盃8強重賽，英甲「神奇球隊」巴拉福特則作客英冠雷丁，雖然雙方近期征戰頻頻，但雷丁最識揀波踢，日前聯賽更收起占美麥基等大部分主力，擺明留力砌低呢隻「矮腳雞」，進軍溫布萊踢4強戰，主勝值捧。

(now 633周二凌晨3時45分直播)

巴拉福特喺今屆足總盃確係非常神勇，之前兩圈淘汰英超一哥車路士及新特蘭技驚四座，其中作客車仔喺落後兩球下反勝晉級更係經典之作，曾為布力般出戰英超嘅箭頭史迪，更喺之前每一圈都有士哥，認真威水。不過，留意番車仔當時為減少戰線有放水之嫌，新特蘭則受困於護級而無心戀戰，因此巴拉福特實際嚟睇並非想像中咁神奇。雷丁今屆雖未遇過英超球隊，但之前三圈全部客勝晉級，包括淘汰同級勁旅打比郡，表現硬淨，上次造訪巴拉福特爛到冇朋友嘅「薯仔田」主場都能力保不失。連埋呢場重賽，雙方都要喺7日內踢3場波，絕對考驗體能。
巴拉福特作客難偷雞

不過相比之下，雷丁準備較充足，與上周中擊敗白禮頓嘅陣容相比，日前被屈福特大炒4比1之役，雷丁只得庫巴同賀比阿克班打正選，其餘主力如笠臣簡奴、占美麥基、普格恩耶克、米高赫達及費達歷斯等統統收起，咁大幅度輪換，擺明留力砌對巴拉福特喇。「矮腳雞」上次喺「薯仔田」都偷唔到雞，今次作客養精蓄銳嘅雷丁好難有運行，斯維預計雷丁可結束對手今屆神奇之旅，一於捧主W啦！