般尼茅夫Run順大起卡城

猪拉多纳

今季英冠可以話係史上最激，竟然有五至六隊爭兩個直接升班位，聯賽榜頭三位更係同分，以較佳得失球差排榜首嘅般尼茅夫，今晚將作客卡迪夫城，肯定唔會手軟手腳狂攻對手，大盤同客勝都不容錯過。

（周三凌晨3時45分開賽）

依家般尼茅夫、屈福特同米杜士堡同得69分，聯賽剩番九場波，每一場波都絕對唔衰得！般尼茅夫捱過二月小低潮後，三月重上勝軌，一班射手好似卡莫根特、比列比文、哥林威爾遜重拾射門鞋，對上兩場雖然有卡莫根特因傷缺陣，不過就輪到比列比文爆發，兩場入五球，咁鬼死堅，卡迪夫城班後衞真係未落場都驚定先呀！
少帥艾迪侯域有料到

不過講到尾，般尼茅夫今季之所以能夠長期排喺前列位置，都要歸功於領隊艾迪侯域，呢位37歲少帥身上流住般尼茅夫嘅血，球員時代喺般尼茅夫出道，職業生涯大部分時間都為呢隊波効力，退役冇耐就成為球隊主帥，當時佢只係得31歲，但就幫球隊護級成功，跟住艾迪侯域嘅首個完整球季更帶領般尼茅夫升班至英甲，依家仲有機會升上英超，真係唔話佢係天才教頭都唔得呀！卡迪夫城作客錄得三連勝，但主場竟然兩連敗，今場對住咁弗嘅般尼茅夫，都係冇運行囉！