戰意旺盛 巴塞屠城

猪拉多纳

美斯帶頭加操放棄假期

今晚歐聯16強次回合好戲碼，「地上最強」巴塞隆拿喺魯營恭候「藍月亮」曼城。首回合對決，巴塞王牌美斯雖然喺完場前12碼宴客，仍然作客以2:1贏波，優勢明顯。今晚佢哋返到主場遇着近況麻麻嘅曼城，以美斯為首嘅一眾球星，仲放棄休假主動加操備戰，咁夠爭勝決心，一於撐巴塞1.95倍「讓主」！

（有線61、64、201及203、中央5台周四凌晨3:45直播）

「地上最強」最近重登西甲榜首，西班牙盃亦成功殺入決賽，歐聯又大有機會晉級8強，難怪巴西國腳尼馬早前接受訪問時，揚言要為巴塞成就三冠王偉業。事實上，尼馬並唔係得把口講，「MSN」鋒線組合威力強勁，入波入到唔識停，季初表現麻麻嘅蘇亞雷斯，連同首回合包辦兩粒入波，近5場斬獲6球，協助巴塞造出5連勝。美斯亦唔執輸，近2場怒轟5球，隊波弗到咁，今晚點會悶親啲主場觀眾先？
哨牙蘇5場入6球

再講吖，巴塞教頭安歷基睇見踢埋今場歐聯後，就要喺「國家打吡」惡鬥皇家馬德里，所以賽前批准球員放日假輕鬆吓，估唔到美斯、碧基、馬斯真蘭奴、達史特根同佐迪艾巴等球星都主動放棄休假，齊齊返訓練基地加操備戰，狀態弗得嚟又夠贏波決心，真係點可以唔捧場呀！
曼城阿古路 耶耶死火

對手曼城就慘情咯，上場英超強陣出擊作客弱旅般尼，點知倒灶輸波跌晒3分，家陣落後榜首車路士6分，仲要打多場，假如歐聯唔能夠晉級，今季四大皆空嘅機會都幾大。弊在「藍月亮」自1月開始戰績每況愈下，中場耶耶托尼踢完非國盃後疲態盡露，對上嗰次入波已經係兩個幾月前。至於首席射手阿古路腳風亦唔多順，連續3場都食白果，隊波整體狀態咁曳，今場造訪魯營仲要焗攻，莫講話反敗為勝晉級，隨時輸鑊甘都似。

首回合：巴客勝2:1
Data King：曼城踢歐聯例失波

‧巴塞近8次喺魯營踢歐聯取得7勝1和。

‧曼城過去3次歐聯鬥巴塞全敗，每場都有球員被逐。

‧「藍月亮」近14場歐聯僅得1場保持不失。
乜都玩錦囊：巴塞歎「私房菜」半場贏得

巴塞過往喺歐聯贏晒曼城，堪稱「藍月亮」剋星，而且佢哋今屆歐聯每逢主場出擊都開出「半贏全贏」，今晚喺魯營再遇「私房菜」，除咗「讓主」值得捧場，不妨揀埋1.75倍「半主」同1.95倍「主主」。
盤路解碼

巴塞近5場歐聯開出「半贏全贏」。
歐聯賽制

採主客兩回合制，今輪為16強次回合。兩回合計打和，計算作客入球優惠，未分勝負將於次回合法定時間後加時30分鐘，加時階段仍計作客入球優惠，再和則互射12碼決勝。