多蒙特上盤博得過

猪拉多纳

谷埋啖氣啅祖雲達斯

歐聯16強次回合大戰繼續上演，多蒙特喺主場對祖雲達斯，讓平半值得博。雖然多蒙特嘅奧巴美揚同馬高列奧斯突然死火，但反而令人覺得，佢哋只係儲定氣等爆發，何況祖記有「野獸」泰維斯整傷足踝要帶傷上陣，戰鬥力大減要唔過！

（有線62及202周四凌晨3:45直播）

首回合多蒙特輸1:2，但佢哋已經爬番上德甲第10位，暫時唔使擔心降班，即使連續兩場被漢堡同科隆守和0:0，都唔代表佢哋走勢回落，唔排除係教練高普落柯打留力，嗌班球員儲定氣對付祖雲達斯，話唔定，今晚大家又會見到奧巴美揚同馬高列奧斯入波，扮蝙蝠俠同羅賓慶祝嘞！
泰維斯要帶傷上陣

另一方面，祖雲達斯日前喺意甲作客以1:0搞掂巴勒莫，連續4場只能夠攻入1球，反映佢哋嘅進攻火力開始下降。更麻煩嘅係，隊中首席射手泰維斯喺比賽入面，曾經被踢到足踝90度扭曲，而且頂硬上踢晒全場，今仗恐怕要帶傷上陣，如果情況嚴重，甚至會錯過今場生死戰。祖記今場已經有中場派路、史杜拿路同後衞迪斯基爾養傷唔踢得，天殘地缺點頂得住班蜜蜂仔呀！

雖然祖記喺聯賽榜以14分領放，表面睇的確好醒，但其實自從新教練阿里斯上任，佢哋嘅士氣已經插水式下滑，除咗中場保羅普巴不斷放風嗌走，前鋒艾華路莫拉達都話想跳槽，甚至泰維斯都冇厘頭傳聞會返韋斯咸，個個爭住跳船咁款，作客出事真係一啲都唔出奇。

首回合：多客負1:2
Data King：半場和勁好路

‧多蒙特以往主場對意大利球會得5勝3和6負。

‧「蜜蜂軍團」連開4場半場0:0。

‧祖雲達斯連開4場半場和。
乜都玩錦囊：多蒙特第一隊入球玩得過

多蒙特喺首回合作客輸1:2，今場冇得諗，一定要贏波至有機會出線，相信佢哋會踢得更進取。相反，祖記近期連作客對切塞納都試過喺上半場失波先，首回合對多蒙特又擋唔住馬高列奧斯，假如佢哋一心保住勝局玩保守，隨時畀多蒙特入波先都唔奇。