羅馬跌Watt讓唔起費倫

猪拉多纳

歐霸盃16強次回合再次上演「意甲內戰」，羅馬今晚喺主場再遇費倫天拿，博對家開1.82倍「讓球客勝」好過，事關羅馬踏入2015年後，得勝率竟跌到得19%。相反，費倫新年後贏過唔少波，只輸過2場，受讓梗係要追啦！

（有線62、202及廣東體育周五凌晨2:00直播）
歇冬後勝率僅19%

羅馬喺歇冬後得3勝11和2負，得勝率僅19%，日前喺聯賽主場0:2不敵森多利亞，即使有隊長托迪傷愈復出都輸波。鬼咩，最近佢哋傷兵勁多，中場史杜特文、後衞巴沙列堤仲傷到冇喺歐霸盃註冊，加上中場尼恩高蘭停賽，副隊長迪羅斯有傷未必踢得，讓波真係好牙煙。
費倫主帥領軍倒戈特醒

另邊廂嘅費倫天拿，日前喺主場2:1反勝AC米蘭，踏入15年後有10勝5和2負，就算同樣傷兵滿營都勁強勢。事實上，費倫有前鋒基奧斯比羅斯、馬里奧高美斯養傷，幸有新加盟嘅翼鋒穆罕默德沙拿撐住，況且教練蒙迪拿今年領軍倒戈特醒，錄得1勝2和，轉晒運唔追等幾時？

首回合：羅客和1:1