漢堡借細再挑柏林

猪拉多纳

最大雙城連環肉搏

德國兩個最大城市本周連環肉搏！漢堡啱啱喺星期一擊敗咗首都柏林，贏得申辦2024年奧運嘅德國代表權。今晚雙方又喺德甲冤家路窄，不過講到足球兩隊都要為護級而戰，而且近期都係破壞多於建設，投X首選細盤；漢堡恃申奧剛贏柏林一役氣勢，加上幾名主力復出，主場小讓平半亦值得兼顧。

（有線61及201台周六凌晨3時30分直播）
漢堡剛贏2024申奧權

漢堡同柏林兩座大城，多年來喺政治、經濟、體育同文化都鬥生鬥死，兩城都係2006德國主辦世盃時嘅主要比賽地點，柏林係今屆歐聯決賽嘅舉行場地，不過北方港漢堡啱啱喺星期一嘅2024申奧投票，以18比11擊敗柏林獲德國代表權，贏得更漂亮一仗。漢堡一班政體高官仲慶祝緊，今晚呢場德甲又有主場之利，當然希望High埋落去。

兩軍目前只排德甲尾四同尾五，都要護級，漢堡近五輪未贏過，新帥辛巴亞雖然改善咗球隊紀律同防守問題，但進攻方面一直交唔到功課，好在主場守得，近三場主場先後贏漢諾威，守和勁旅慕遜加柏同多蒙特，就係靠一個狠字，尤其今季加盟嘅瑞士國腳比哈美更加係出名嘅「殺人王」，令對手鋒將退避三舍。今場門將杜布尼同中場積拉錫停賽，不過前國腳門將艾達上仗臨危復出表現出色，勢要乘機重新上位，今仗仲有佐羅、雲達華治、尼古拉梅拿同拉蘇加等主力復出，可以睇高一線。
哈化組織進攻唔掂

早前令人失望嘅哈化柏林喺新帥戴達接手後已逐步企穩，不過組織進攻能力一樣唔掂，上次作客面對降班膽史特加都好辛苦至守和0比0，跟住主場雖然和到史浩克同入咗兩球，但兩個入球都係靠對手三號門將韋倫雷特甩手至執到雞，今仗作客難入波，吼細盤同上盤。