車仔跌Watt啞火作客獻細

猪拉多纳

(日)31 侯城 VS 車路士

開季係威係勢嘅車路士近排跌晒Watt，喺歐聯16強出局之後又贏唔到修咸頓，真係「寸王」莫連奴都冇晒符。今晚車仔將會作客侯城，對手實力雖然渣，不過護級球隊發起力上嚟都可以好恐怖，車仔前線仲要啞晒火，頂多小勝，不如博吓1.75倍嘅細盤仲和味。

（now 621周一凌晨零時直播）

上半季嘅車仔勁到無倫，火力全開，迪亞高哥斯達、夏薩特、奧斯卡杜斯山度士個個撻着晒，而更重要嘅係後面有個法比加斯不斷餵靚波畀佢哋，又點會難入波吖！不過「法比佬」近排狀態下滑，仲衰到畀車迷噓爆，但睇番數據，「法比佬」又真係冇貨交，近10場比賽都冇交出任何入球或助攻，而傳波準確性亦比上半季下跌，創造機會次數更勁跌。但原來「法比佬」已經唔係第1季喺下半季跌Watt，近7個賽季，無論佢係効力緊阿仙奴定巴塞隆拿，都係出現虎頭蛇尾嘅情況，咁搞法唔怪之得雲格唔要番佢喇！
侯城肉緊搶分會死守

法比加斯冇態，車仔近排入球數字真係大幅下降，其他攻擊球員好似夏薩特、奧斯卡杜斯山度士等狀態又跟住下滑，搞到車仔成日要靠伊雲洛域、泰利呢班後衞入波，堅係唔掂喎！今場嘅對手侯城依家以28分排喺第15位，同第18位嘅般尼只有3分嘅距離，今場對住車仔「老虎」都要變做縮頭烏龜，死守之下細盤穩陣呀！