曼聯當旺 客窒利物浦

猪拉多纳

英超弗爆雙紅會

今晚西甲有國家打吡巴塞對皇馬，英超就有「雙紅會」─利物浦鬥曼聯，一樣咁激呀！「雙紅」今晚會喺晏菲路球場決一高下，兩隊都係喺英格蘭頂級聯賽奪標次數最多嘅球隊，對上兩次聯賽交手各贏一次3:0。利記領隊羅渣士變陣後，聯賽即刻連贏5場，曼聯都唔差，就算成日畀人話贏波靠運，但3連勝不失一球真係唔易o架！今晚兩隊再次交手，利物浦雖然有主場之利，但要贏波贏盤有啲難度喇，一於捧1.72倍「讓球客勝」！

利物浦依家同第4位嘅曼聯只相差2分，未計尋晚賽果，同二哥曼城亦都只得4分之差，要打入前4唔再係夢。「窮則變，變則通」，自從領隊羅渣士改打3-4-3陣式後，成隊波生晒，聯賽造出13場不敗之餘，仲激活咗巴西中場菲臘比古天奴同佐敦軒達臣。
佐敦軒達臣勁弗

前者踢到曉飛，近4場英超入咗2球，「新神奇隊長」軒達臣仲勁，已經連續3場有貨交，包括上場一箭定江山擊敗史雲斯！不過首循環嗰陣，利記喺奧脫福球場慘吞3蛋，今晚雖然有主場之利，但讓到一球要贏波兼贏盤似乎有啲難度！

另邊廂，曼聯近排狀態同樣強勁！佢哋上場對熱刺用咗半場就口趙入3粒，下半場雖然冇繼續去盡，但後防依然做到嘢，搞到熱刺冇啖好食，連續3場聯賽都保持不失。
紅魔3場不失

雖然前線方面無咗尹佩斯，但隊長朗尼最近狀態一流，近4場射入4球！再加上二哥曼城上場爆冷輸咗畀護級分子般尼，痛失3分，令到同曼聯嘅差距收窄至2分，大大激發紅魔鬼嘅鬥心，目標唔再只係重返歐洲賽，仲要搶走二哥席位！今晚雙紅會，兩隊鬥心同實力不相伯仲，相信要鬥到最後一刻先分到勝負！既然係咁，支持受讓嘅曼聯着數啲，就算分唔到勝負都贏盤吖，一於捧紅魔1.72倍嘅「讓球客勝」！
乜都玩錦囊：玩埋紅軍入波先

「雙紅會」向來精彩緊湊，唔怕冇波入出現悶場。雖然話曼聯今仗有力保住不敗，不過翻查紀錄，原來利物浦喺自己地頭迎戰紅魔特別亢奮，對上6次喺晏菲路球場交手，利物浦次次都係先開紀錄嗰隊，況且射手史杜列治同中場謝拉特鬥曼聯特別醒神，一於追埋利物浦1.69倍第一隊入球。
Data King：火爆大戰多紅牌

‧利物浦前鋒史杜列治3次喺聯賽為紅軍上陣鬥紅魔，一共攻入2粒。

‧紅軍中場謝拉特對上11次聯賽鬥曼聯射入7球。

‧曼聯係英超球隊中作客晏菲路球場贏波次數最多嘅球隊（10次）。

‧歷來英超「雙紅會」夾埋出現15張紅牌。
盤路解碼：曼聯今季聯賽14場作客輸3場，不敗率約79%。