車仔踩行油 「讓客」先夠侯

猪拉多纳

「寸王」心急想提早捧盃 英超 0:00（日）31 侯城 Vs 車路士

英超球隊喺歐洲賽全軍覆沒，意味英超餘下戰程將會更加緊湊，原因係所有球隊均無歐洲賽後顧之憂，全力專注踢番本土聯賽！當中榜首車路士連足總盃都晨早Game Over，今季只係剩番10場英超要踢，以「寸王」莫連奴性格，一定想盡快捧盃封王以免夜長夢多，今晚養精蓄銳作客侯城要贏兩粒唔難，捧「讓球客勝」。

（now621周一凌晨0:00直播）

老實講，樂比甚少喺作客讓波嘅情況都捧「讓球勝」，尤其係車仔呢啲孤寒球隊，有時求佢哋入多粒都好難，不過侯城本身實力同狀態都頗唔掂，加上「藍戰士」自歐聯畀巴黎聖日耳門踢出局後，上周聯賽對修咸頓又贏唔到，好勝嘅「寸王」早已谷埋成肚氣，今場搵弱隊侯城嚟祭旗就最好不過。
6訪侯城5場贏兩粒

事實上車仔人多勢眾，目前僅得約翰米基爾一名傷兵，隊波成20件國腳級人馬，一個星期應付一場波，可以話係有人滿之患，邊個狀態稍為冇咁Top都隨時冇份踢，所以可以想像班「車仔」必定會加多兩錢肉緊。況且車仔對付侯城向來有辦法，近3次交手無論主場定作客都順利贏兩粒，特別近6次作客侯城，都有5次贏到兩球或以上，所以樂比今日仍決定投車仔一票。
謝拉域 侯度史東缺陣

侯城目前護級危危乎，今仗仲要人腳不整，今季射入8球嘅首席射手謝拉域因傷倦勤，另外中場重心侯度史東亦要停賽，呢兩位仁兄缺陣對侯城影響相當大，而且仲未計辛迪加斯、迪亞美、羅仙尼亞、占士謝斯達同羅比巴迪等長期傷兵，所以車仔要贏兩球唔係難事吖！
樂比推介：車路士（讓球客勝）