大打進攻足球 波琴衝冧紐倫堡

猪拉多纳

今晚德乙有場獨腳戲，由兩支中游球隊交手，紐倫堡主場鬥波琴。佢哋依家距離升班席位超過10分差距，同時未有護級壓力，落場有幾多鬥心真係難以估計。不過後者喺新帥華碧克上任後連續5場不敗，火力仲大有改善，呢次波琴受讓平半至少執半格，2.1倍下盤諗得過。

（開賽時間：周二凌晨3:15）

今季降咗落德乙嘅紐倫堡，雖然季前被人認為係升班熱門之一，可惜佢哋整體演出平平，最近仲連輸2場，計落同升班席位相差超過10分，重返德甲機會愈見渺茫。即使佢哋今仗有中場普歷克復出，睇怕都好難挽救低沉嘅士氣，呢鋪就算主場出擊都靠唔住。
波琴聯賽 不敗率達8成

相反波琴近況有說服力得多，佢哋自從搵咗新帥華碧克領軍後，近5仗不敗之餘，而且4次至少轟入對手2球。一對箭頭施斯達克、泰路迪合共交出7球士哥，將華碧克提倡嘅進攻足球哲學發揮得淋漓盡致。況且波琴今季聯賽25戰輸得5場波，不敗率達8成，想砌低佢哋真係一啲都唔容易。更何況佢哋依家火力全開，分分鐘發惡打爆埋紐倫堡都得。