韋甘比衝甲打落水狗

猪拉多纳

盧頓4連敗谷唔起

由於嚟緊係國際賽期，今晚賽事場面比較冷清，不過阿King依然搵到好嘢，就係英乙補賽直播戲碼，由排第6嘅盧頓喺主場迎戰3哥韋甘比，前者連輸4場曳到無倫，韋甘比為保直升甲組資格，仲唔趁住盧頓頹爆大打落水狗咩？平手盤不容錯過。

（TVB 301周三凌晨3時45分直播）

大家都知英超前四嘅歐聯入場券同英冠升班資格爭持激烈，估唔到連英乙都一樣，雖然韋甘比位列第3，但只係比第4嘅貝利多1分咁大把，由於英乙頭三位可直接升上英甲，若果韋甘比今仗贏波便可甩開貝利4分，對「衝甲」幫助極大，該隊有前阿仙奴青訓產品恩拿利斯壓陣，呢位有塞浦路斯同中國血統嘅21歲後衞，今年由英冠嘅賓福特借投，實力有番咁上下。

盧頓現時排第6位，睇落唔算太差，而佢哋亦要搶分保住升班附加賽資格，可惜球隊之前4場比賽輸晒，狀態曳到想谷都谷唔起，撞正近10場作客不敗嘅韋甘比，盧頓主場出擊都靠唔住，平手盤撐韋甘比。
羅奇代爾有鬥志值捧

至於英甲奧咸主場對羅奇代爾，後者排第8，比第6嘅彼德堡少3分但打少兩場，仍有機會爭取前6嘅升班附加賽資格，奧咸日前雖然擊敗克魯終止3連敗，但佢哋近兩場勝仗均來自作客，返回自己地頭好似唔識贏波，季尾波鬥志行先，寧撐羅奇代爾好過。

（周三凌晨3時45分開賽）

最後巴省聯哥連泰斯主場出戰波圖基沙，哥連泰斯連自由盃在內近8仗贏7場，但中場伊利亞斯文迪斯和後衞基爾施華獲巴西國家隊徵召，令實力受削，未必贏到波圖基沙，揀番讓球客勝。

（周三早上6時30分開賽）