德國-2照劏袋鼠

猪拉多纳

世界冠軍明恰亞洲冠軍

世界冠軍德國將於凱沙羅頓主場費斯禾達球場布陣，迎戰出爐亞洲冠軍澳洲，德國贏得世界盃後狀態下滑，歐國盃外圍賽接連失利，球隊四日後將會喺歐國外作客格魯吉亞，經理比亞荷夫聲言要認真備戰，今晚主場對「袋鼠兵」矢志要復仇兼壯行色，澳洲陣容不整，賽前更有靈魂人物卡希爾負傷無緣出師，讓球主客和德國讓兩球，推介德國讓球勝。

（無綫翡翠台及ＴＶＢ13台周四凌晨3時30分直播）

德國喺世盃後經歷調整期，歐國盃外圍賽先後作客不敵波蘭同主場賽和愛爾蘭，目前四戰僅得七分排Ｄ組次名，認真冇面，今次備戰同點兵都相當認真，並冇選任何新兵，盡用強陣，久傷初愈嘅拜仁慕尼黑守將畢斯杜巴同多蒙特中場根度簡重新入伍，至於去年尾因傷缺陣嘅曉姆斯、馬高列奧斯、奧斯爾同舒賀爾尼都悉數回歸。
澳洲殘陣冇埋卡希爾

今仗雖然只係熱身賽，但經理比亞荷夫賽前聲言要認真從事。德國歷來四次對澳洲三勝一負，但上次2011年熱身賽主場輸1比2，今仗矢志復仇，何況足總啱啱同領隊勒夫續約到2018年，教埋下屆世盃決賽周，今晚點都要贏番場漂亮勝仗沖喜。

澳洲剛喺主場贏得亞洲盃，之後未有比賽，今次作客歐洲會應付今晚對德國同下周中對馬其頓嘅熱身賽，但領隊普斯迪高路手上兵源短缺，米杜士堡守將拉斯威廉斯、阿士東維拉守將基斯靴特、亞洲盃決賽正選中堅西悉尼流浪者史柏拉洛域、利華古遜鋒將羅比古斯都因傷缺陣，中場比斯安奴退役，陣容本來已經甚殘。

澳洲賽前兩日再傳來噩耗，靈魂人物卡希爾剛為北京國安上陣時受傷，決定留喺中國治療，無緣隨隊歐旅。普斯迪高路焗住徵召幾名欠缺經驗球員頂檔，包括從未入選嘅布里斯班獅吼守將迪維利、阿德萊德聯中場泰歷艾列治同拉素19歲小將艾干奴米迪斯，志在畀佢哋吸收經驗，面對認真作戰嘅德國唔夠砌。