蘇格蘭北愛Hea歎細界

猪拉多纳

趁住今輪歐國盃外圍賽未開打，蘇格蘭今晚喺主場搵北愛爾蘭「拍跳」，上演英倫三島內訌。由於雙方嚟緊要應付歐國外，今仗志在寓賽於操，必定避重就輕Hea住嚟踢，咁啱蘇格蘭幾名前鋒表現跌Watt，預計會係悶戰一場，斯維寧捧入球細。

（周四凌晨3時45分開賽）

蘇格蘭自2013年由名宿史特根接手後，演出穩步上揚，呢班波不嬲冇球星，大部分係英超二線兵，史帥擅於限米煮限飯，激發球員鬥志，將一盤散沙嘅蘇軍糅合得非常團結，之前10場取得5勝3和2負，並喺歐國外D組排第3，成績絕對唔失禮。史帥今次召入史葛布朗、安亞、馬隆尼、史提芬費查及賴史密夫等常規兵，但後三者作為前鋒，近期喺芝加哥火燄、新特蘭同愛華頓都陷入球荒，啞晒火唔多靠得住。
留力應付歐國盃

同蘇格蘭相比，北愛更加多冇人識嘅二打六，日前被球證點錯相趕出場嘅西布朗黑仔後衞麥奧尼，算係近期曝光率最高嘅北愛球員，拍得住因吐口水而要停賽多場嘅曼聯中堅莊尼伊雲斯，據報上一輪國際賽期首度入選但未獲派上陣嘅另一紅魔後衞麥尼亞，今仗有機會為北愛作處子登場。查實北愛喺今屆歐國外表現突出，喺F組連挫匈牙利及希臘排第2。

由於歐國外每組頭兩名可直接殺入決賽周，第3亦可踢附加賽，因此呢兩支英倫三島球隊想踢大賽唔再係發夢，今仗只係熱身賽無關痛癢，為免有乜損傷，影響幾日後喺歐國外分戰直布羅陀同芬蘭，相信佢哋都會Hea住嚟踢，唔慌多波入，細盤乃不二之選。