哈神地標戰有睇頭

猪拉多纳

英軍主場數立陶宛冇懸念

讀開歷史嘅人成日都會討論究竟係時勢造英雄，定係英雄造時勢，呢排熱刺前鋒哈利卡尼狂數胡成為英超球迷茶餘飯後嘅話題，仲畀人捧為「哈神」，可以話係英雄造時勢，而英格蘭近排遇上傷兵潮，畀咗個好機會等首度入選國家隊大軍嘅「哈神」上位，就真係時勢造英雄。「三獅軍團」今場喺歐國盃外圍賽E組主場迎戰立陶宛，唔睇「哈神」睇邊個？英軍讓兩球都照捧讓球主勝呀！

（有線61及201台周六凌晨3時45分直播）

喺E組4戰全勝嘅英格蘭最近傷兵滿營，史杜列治、拉爾拉拿、勞基梳爾等紛紛因傷退隊，連史達寧都話腳趾有傷，今場要頂硬上，搞到領隊鶴臣向外界大呻今鋪勁麻煩，未能以強陣應戰。
升呢大國腳揚言非戥腳

其實呢位老人家咁樣講似係想幫「三獅兵」減壓多啲，今場對手係同英軍實力差九條街嘅立陶宛，英軍主場出戰贏波根本就冇難度！英格蘭雖然成日喺大賽冇料到，但喺大賽前嘅外圍賽往往都能展現「勁旅」本色，最叻就係蝦弱隊，唔講以前，「三獅軍團」最近都炒過魚腩聖馬力諾5蛋，又贏到斯洛文尼亞同蘇格蘭3比1，只係勁過聖馬力諾少少嘅立陶宛今場都係乖乖投降喇！

今場波嘅焦點唔係英格蘭究竟炒到對手幾多粒，而係預料會拍住朗尼擔正嘅哈利卡尼究竟係咪「三獅」新希望，呢位迄今一共為熱刺射入29球嘅21歲小國腳喺「升呢」後，揚言唔係嚟「戥腳」，誓要趁住英軍傷兵潮成為「三獅英雄」，勁有鬥志。弗到漏嘅「哈神」對住英超啲後衞入波都易過食生菜，今場對住冇咗主力守將史坦基域斯嘅立陶宛，仲唔係「哈神」上位嘅極佳時機？