勝利派o靚上岸做大騷

猪拉多纳

澳職常規賽殺入最後直路，落後榜首威靈頓鳳凰4分排第2嘅墨爾本勝利會喺主場面對中岸水手，喺多位球員分別因傷及為國征戰國際賽嘅情況吓，勝利主帥梅斯卡特今場大膽搵嚟7位年輕小將進入大軍名單，正所謂初生之犢不畏虎，呢班「o靚仔」肯定會把握今次機會騷哥利，大盤值得捧場！

（有線64及203台周五下午4時40分直播）

除咗有前鋒巴巴路西斯因傷避戰，今輪國際賽期墨爾本勝利仲有中場米利根，以及後衞丹尼爾佐治夫斯基、謝利亞同史葛加路維離隊為國出戰，勝利一冇就冇咗3名守將，防守都幾大鑊，但喺要搶分嘅情況下，勝利教頭梅斯卡特惟有盡地一煲，將納博特、馬卡魯拿斯等7位年輕球員加入一隊，大部分都係進攻球員，睇得出梅斯卡特今場想以攻代守，用呢班唔知個死字點寫嘅後生仔衝散中岸水手。
水手風流波鬥搶攻

其實勝利近3次對住水手全勝之餘，更場場入到3球，睇怕有守將米高尼爾同史唐路斯缺陣嘅水手今場都係難逃厄運。而且，排喺第8位嘅水手爭入季後賽機會不大，球員或抱風流波心態，同勝利鬥攻又有何妨？一於捧大盤喇！