「雙尼」火力猛 三獅兵-2大陶殺

猪拉多纳

哈利卡尼擔正爭上位

今晚歐國盃外圍賽擔大旗，英格蘭會喺E組迎戰弱旅立陶宛，焦點所在梗係首度躋身大國腳嘅哈利卡尼啦！呢位熱刺新貴近排腳風順到冇朋友，今場同隊長朗尼組成「雙尼」鋒線搏殺，就算讓兩球照捧2.02倍「讓主」！

（有線61及201周六凌晨3:45直播）

英格蘭繼史杜列治同拉爾拉拿受傷退隊，跟手輪到史達寧話腳趾有傷，踢埋今場就會提早返利物浦，難怪領隊鶴臣都詐晒型，預咗會再有國腳退隊咁話。查實鶴臣又唔使擔心嘅，冇咗「紅軍幫」孭飛都仲有「熱刺幫」賣命，首獲徵召嘅哈利卡尼今季大爆發，上場鬥李斯特城更做出英超生涯首次帽子戲法，累積19個入球仲同「迪哥」並列射手榜首位，今場夥拍連續4場國際賽有進帳嘅朗尼數胡，「雙尼」勢必擦出唔少火花，入波易過食菜啦！
「熱刺四子」蓄勢待發 立陶宛欺善怕惡

除咗哈利卡尼今場處子戰勢必搏盡，右閘基爾獲加就相隔年半後再獲重召，今季演出標青嘅賴恩美臣，就因為拉爾拉拿退隊得以首次入選，加埋等緊機會上位嘅安祖斯唐辛，「熱刺四子」個個蓄勢待發等上位，其餘「三獅兵」又點敢唔搏保住國家隊地位先？

對手立陶宛則屬於「欺善怕惡」，頭4輪分組賽只能喺同屬弱旅嘅愛沙尼亞、聖馬力諾身上搵到食，主場硬撼同組「三哥」斯洛文尼亞都淨吞兩蛋，作客「二哥」瑞士更加慘吞4蛋收場，今場造訪溫布萊惡鬥同組最強嘅「三獅兵」，想輸少粒都幾難囉！

歐國盃E組
盤路解碼

「三獅兵」近6場全勝，開出2次「贏贏」及4次「和贏」。
Data King：英格蘭主場兩戰入8球

‧英格蘭兩戰分組賽主場斬獲8球，平均每場攻入4球。

‧英格蘭頭4輪僅失1球，為分組賽防守最佳國家隊之一。

‧立陶宛近5場歐國外贏得1場，對手為「魚腩」聖馬力諾。