比利時遇弱-2好路

猪拉多纳

「歐洲紅魔」比利時早排嘅表現就好似正牌「紅魔」曼聯咁，雷聲大、雨點小，喺歐國盃外圍賽B組3戰只得1勝2和，只得5分排喺組內第4，出線唔算太樂觀。「歐洲紅魔」今場會喺主場對塞浦路斯，誓要嚟個大翻身，曼聯都可以及時復甦連贏熱刺同利物浦喇，比利時又點會炒唔到弱旅塞浦路斯呀？讓兩球都照撐！

（有線62及202台周日凌晨3時45分直播）

比利時近年人才輩出，夏薩特、費蘭尼、泰拔高爾圖斯等球員都係歐洲大球會陣中不可或缺嘅主力，上年嘅巴西世界盃成功以首名出線殺入淘汰階段，去到8強先力戰而敗，畀該屆亞軍阿根廷淘汰。但嚟到今次歐國盃外圍賽，「歐洲紅魔」竟然冇晒霸氣交唔到貨，而且淨係識「欺善怕惡」，大炒安道爾6蛋後，連和威爾斯及波斯尼亞，依家排名仲低過塞浦路斯，好曳囉！
塞浦路斯34年未贏過比軍

「歐洲紅魔」咁叻蝦弱隊，今場對住塞浦路斯機會嚟嘞，一於要炒番場證明吓自己仲係歐洲強隊！塞浦路斯自1981年後就未贏過比利時，嗰陣比利時都未算係一級勁旅，塞浦路斯已經畀佢哋食住，依家對住擁有黃金一代嘅「歐洲紅魔」，真係聽炒呀！比利時今次有盧卡古因傷未有入選，不過由大勇嘅夏薩特、奇雲迪布尼同費蘭尼所組成嘅黃金中場線，都夠力請對手食蛋，一於捧1.95倍嘅讓球主勝喇！