西甲3星教訓「海盜」 格仔兵「讓主」攞威

猪拉多纳

克羅地亞「西甲3子」幫皇馬教仔！克羅地亞今晚喺主場擺擂台，同挪威合演歐國盃外圍賽H組大戰。「格仔軍團」有文迪蘇傑、莫迪歷同拿傑迪錫3大「西甲兵」壓陣，對住挪威贏波話咁易，順便幫皇家馬德里「天才」馬田奧迪加特上堂都仲得！「格仔軍」2.3倍「讓主」抵玩！

(有線61、64、201及203周日凌晨1:00直播)
挪威靠晒「白紙」奧迪加特

「格仔軍團」依家喺H組，以較佳得失球力壓意大利做緊榜首。開個頭開得咁靚，都係多得佢哋3位「西甲兵」。効力馬德里體育會嘅射手文迪蘇傑，雖然早排喺歐聯對利華古遜時受傷，但領隊尼高高華話佢冇大礙，仲話文迪蘇傑畀架坦克撞中都唔會有事！況且克羅地亞中場仲有巴塞隆拿嘅拿傑迪錫同「銀河艦隊」指揮官莫迪歷壓陣，「維京海盜」成場有排畀人玩。

挪威近年積弱，喺國際大賽真係連影都冇，上年爆出一個奧迪加特，已經係近10年難得一見嘅天才。呢位16歲進攻中場雖然好波，但經驗就真係同張白紙冇乜分別，今場對住3位西甲老大哥，都係乖乖哋跟人學吓嘢，唔好搞咁多花臣喇！
Data King：格仔兵主場5連勝

‧「格仔軍團」近5戰主場全勝。

‧挪威自2007年後未贏過克羅地亞。

‧克羅地亞外圍賽4戰只失1球。