北愛爾蘭半場摸和芬蘭

猪拉多纳

真係講都冇人信，一向被視為弱旅嘅北愛爾蘭喺今屆歐國盃外圍賽表現出色，F組4戰贏咗3場，竟然以9分排喺組內第2，如果保持住呢個勢頭，大有機會歷史性首次殺入歐國盃決賽周。北愛今戰會喺主場出戰芬蘭，客隊今場失去兩大主力，對住防守穩陣嘅北愛難攞甜頭，若嫌細盤得1.46倍冇肉食，科娜建議改玩半場和。

（有線64及203台周一凌晨零時直播）

今場波係喺當地時間周日踢，星期日一向係基督教傳統嘅安息日，北愛爾蘭以往從未喺安息日於主場作賽，雖然有人提議今場波提前或者延後舉行，但歐洲足協堅持唔改期，搞到有宗教團體計劃喺周日示威抗議。雖然場外可能會有示威活動，但相信場內北愛嘅球員同球迷都會齊心抗敵，因為北愛今次出線有機，唔可以畀其他因素影響到。
客軍缺兩大主力

北愛喺3日前嘅熱身賽輸畀蘇格蘭，但其實當時好多主力都冇上陣，預料史堤芬戴維斯、布拉特等大將今仗會復任正選，再加上曼聯一對後衞莊尼伊雲斯同麥尼亞鎮守後防，堅呀！僅得4分嘅芬蘭今場有兩大主將希迪馬治同阿基維奧因傷缺陣，對球隊係一大打擊，今場想搶分都有心無力。

不過芬蘭始終唔係魚腩，北愛點都要忌佢三分，今場為免出現爆冷賽果，可以預計佢哋會穩打穩紮，雙方上半場好大機會冇交收，一於揀半場和。