巴西邊緣人爭位大作戰

猪拉多纳

今日咁多歐洲國家盃外圍賽，其實仲有一場重量級熱身賽冇得直播，就係巴西對智利，咁阿King就先同大家傾吓呢場啦！呢場係「巴西世盃16強翻版戰」，一班「森巴邊緣人」要搏表演趕搭美洲盃尾班車，智利就要報番世盃落敗之仇，大家唔荒Hea踢，梗係要捧入球大啦！

（周日晚上10時開賽）

呢場波喺倫敦酋長球場上演，一班効力歐洲列強嘅森巴球員唔使舟車勞頓，之前作客法國大勝3比1，不過，話晒呢班巨星喺球會賽事仲有後顧，今場領隊鄧加或者會變陣，但大家又需要擔心攻力，因為嚟緊6月就係美洲國家盃，副選兵包括射手雷斯阿祖安奴、中場菲臘比古天奴、伊利亞斯文迪斯同祖斯夫蘇沙個位都唔穩陣，今鋪若果有機會落場，實會搏盡取悅鄧加。
智利召費倫孖寶鬥攻

至於巴西今仗對手智利更加係美洲盃主辦國，熱身賽唔可以失威，今次大軍當中粒粒皆星，除咗阿歷斯山齊士、麥克干沙利斯同維達爾之外，仲重召咗冇份入選巴西世盃名單嘅「費倫孖寶」馬迪亞斯費南迪斯同大衞比沙路，絕對唔怕同巴西鬥攻，今場入球大揀先。
普雷斯頓大勇要追

另外，今日仲有一場英甲直播費列活特對普雷斯頓（TVB 301周日晚9時15分直播），普雷斯頓雖與聯賽一哥相差10分，但由於要保住直接升班資格，所以仍不容鬆懈，以球隊近期連番奏捷之勢，作客亦可反客為主。至於早場日乙睇中櫪木SC對德島漩渦半場和，德島漩渦近3次都開半和，而主隊亦冇乜撕破對手後防實力，半場和啱數。