色得揀 梗係揀比利時

猪拉多纳

係咪踢得曼聯嘅球員，都係冇品兼無情無義嘅呢？好似比利時「爆炸頭」費蘭尼今季受到「紅魔鬼」領隊尹戈爾重用，成功翻生，佢有奶便是娘，早前狂踩恩師莫耶斯唔掂，勁忘恩負義囉！不過你有你鬧，佢有佢繼續發威，吹咩？費蘭尼上場歐國外梅開二度，幫比利時取得大勝，「歐洲紅魔」乘勝追擊，作客以色列，力爭升上B組榜首，客勝可捧！

（有線61及201台周三凌晨2時45分直播）
費蘭尼弗到冇朋友

莫耶斯將「爆炸頭」由比甲帶嚟英超，再一手一腳將佢帶到豪門曼聯，真係稱得上對佢恩重如山，點知「爆炸頭」見高拜見低踩，早排接受訪問嗰陣不停踩莫耶斯「冇料到」、「唔夠硬淨」，又大擦尹帥鞋，真係好賤囉！不過落到球場，唔理個球員私德係點，只要好波咪得囉！

「爆炸頭」近期真係勁掂，月中英超對熱刺靠佢早早先開紀錄，助曼聯輕鬆大勝；擊敗利物浦嘅「雙紅會」又係靠佢破壞晒紅軍嘅中場組織；嚟到上周末佢代表比利時出戰歐國外炒塞浦路斯5蛋一役，佢又轟入首球，為比軍揭開大屠殺序幕，狀態確係弗到冇朋友。
以色列主場冇運行

當然，比利時呢支歐洲新貴又點會得費蘭尼一個，夏薩特、賓迪基、奇雲迪布尼等個個都獨當一面，呢班主力今場應會悉數上陣，誓要攞晒3分上榜首。以色列喺今屆歐國外戰績唔錯，4戰得9分排喺第2，不過佢哋上場吞咗威爾斯3蛋，信心士氣難免受挫，對住技高一籌嘅比利時，主場一樣冇運行，科娜推介客勝。