鬥牛兵踩扁爛橙

猪拉多纳

世盃慘敗要報仇

相信大家都記得上年世盃分組賽，荷蘭憑住尹佩斯飛天頭槌，加埋爆Seed嘅洛賓，大數西班牙5:1令後者最終羞家出局。正所謂仇人見面分外眼紅，今晚熱身賽狂牛大軍作客阿姆斯特丹出戰荷蘭，撞正對手態沉兼冇晒主力，仲唔乘機打落水狗報仇，2.2倍客勝咪走寶。（開賽時間：周三凌晨2:45）
希丁克接手跌Watt 荷蘭「劏牛孖寶」打柴

西班牙喺上年世盃B組首戰以1:5慘負荷蘭，賽後畀萬人圍插，當時有份落場嘅球員包括大衞施華，恩尼斯達同卡斯拿斯等人，到依家都仲屈住一肚氣。今晚再遇仇人，梗係要搏盡出番啖氣，就算左閘佐迪艾巴因傷退隊都冇有怕。

相反荷蘭自從由領隊希丁克領軍後，成績一落千丈，7場比賽只贏到哈薩克同拉脫維亞呢啲弱旅，對住啲二線波捷克、冰島都要輸波收場。佢哋上仗喺歐國盃外圍賽A組主場鬥土耳其，只係靠前鋒亨特拉爾喺完場前入波先扳平1:1，足見呢支傳統勁旅霸氣盡失。加上「劏牛孖寶」射手尹佩斯、翼鋒洛賓齊齊打柴，咁仲點頂得住復仇心切嘅「狂牛大軍」先？