攻勢猛列 比利時唔怕追

猪拉多纳

比利時件件當打，陣中最大年紀嘅主將高柏尼，講緊都係28歲，證明「歐洲紅魔」係幾咁得人驚！佢哋啱啱先炒完塞浦路斯一鑊杰，由夏薩特、奇雲迪布尼、費蘭尼同賓迪基組成嘅進攻四虎個個都獨當一面，有佢哋衝鋒陷陣，今晚喺歐國盃外圍賽B組造訪有信心危機嘅以色列，當然有望大勝而回，撐2.45倍「讓球客勝」。

（有線61及201周三凌晨2:45直播）
進攻四虎有料到

計人腳同級數，比利時絕對有能力重上B組榜首，中場奇雲迪布尼賽前表示，大炒塞浦路斯5蛋打起晒班手足嘅信心，今鋪實會乘勝追擊。奇雲迪布尼助攻一流唔使多講，拍檔費蘭尼同夏薩特一個頂得、一個扭得，加埋個衝得嘅賓迪基，呢個進攻四虎叫人點頂呀？

仲有，今年先21歲嘅巴舒亞伊上仗處子戰鬥塞浦路斯即刻有波入，唔少球評家都讚呢位馬賽前鋒嘅潛質比奧歷治更優厚，領隊韋莫斯大把兵使，唔使驚撕唔破以色列嘅防線。
以色列陷信心危機

睇小以色列，皆因佢哋上仗淨吞威爾斯3蛋之後陷入信心危機。據當地傳媒爆料，雖然以色列總理內塔尼亞胡賽後走入更衣室安慰球員，但嗰場波領紅嘅罪人迪比就明顯控制唔到情緒，周圍掟櫈發洩。一班隊友亦都Down到爆，教練團直情取消埋翌日嘅操練，逐個同球員作心理輔導，成班波信心崩潰，點搞呀？更何況迪比今晚要坐波監，前鋒達馬利又因鼠蹊受傷無緣披甲，咁嘅狀況似係聽炒居多。