聖羅倫素聖保羅做大騷

猪拉多纳

聖羅倫素今季喺聯賽表現出色，偏偏喺南美自由盃B組正陷出局邊緣。聽朝呢支阿甲榜首將會喺主場迎戰聖保羅，再唔贏波睇怕佢哋隨時要執定包袱，呢鋪唔攻唔得。至於聖保羅教練拉馬奴賽前放風指要K.O.對手，擺明一副「駁火格」，2.45倍入球大抵玩。

（開賽時間：周四早上6:45）

先講B組目前形勢，哥連泰斯3戰全勝排榜首，聖保羅則以3分之差力壓得3分喺手嘅聖羅倫素屈居次席。若然聖羅倫素今次贏唔到，出線形勢將會更加被動，點到佢哋唔搏。雖然前鋒維拿巴尚未復操，好在球隊另一箭頭莫路麥圖斯腳風夠順，近2仗共入3粒，配合上仗打破入球荒信心大增嘅卡奧達奧斯奧攻堅，聖羅倫素鋒力依然有保證。
聖保羅講明搶攻

另邊廂聖保羅亦唔想夜長夢多，賽前教練拉馬奴表示唔想打單箭頭咁保守，有意搵射手柏圖（左圖）拍住卡亞迪斯大踢進攻足球，仲揚言話要砌低對手，盡快鎖定出線席位，加上巴西國腳中場祖斯夫蘇沙趕及歸隊，呢鋪就算作客都唔赦對手。