墨爾本城搶分誓破浪

猪拉多纳

西悉尼亞冠盃前例輸波？

澳職常規賽開始入直路，西悉尼流浪者今日喺主場對墨爾本城，出事唔奇。事關西悉尼今季有條「踢亞冠盃前例輸」嘅定律，聯賽5戰全敗未試過有分落袋，對家墨爾本城贏埋今場就好大機會穩奪季後賽席位，讓平半2倍博得過！

（有線64及203周五下午4:40直播）
西悉尼傷兵滿營

掛住踢亞冠盃嘅西悉尼，現時喺聯賽榜排倒數第2位，季後賽唔使預佢哋。仲有呀，前鋒馬克布歷治、辛達利比、高尼同中堅史柏拉洛域養傷，就算射手杜米祖歷同蘇迪里奧踢完國際賽歸隊都靠唔住。特別係西悉尼跟手要喺亞冠盃主場惡鬥FC首爾，今季佢哋5次喺亞冠盃前踢聯賽全敗，完全係輸波罷就格，況且佢哋喺分組賽出線形勢仲未明朗，今仗隨時留力亞冠盃都未定。
墨軍保頭6踢季後賽

另邊廂嘅墨爾本城為咗保住頭6嘅季後賽席位，最近連贏3場反彈，期間甚至贏過前列分子嘅FC悉尼，睇得出佢哋狀態已經上力。好消息係首席中鋒約舒亞堅尼地，上仗對獅吼嗰陣已經好番復出，預計會繼續擔正攻堅。況且中場指揮官阿倫穆爾踢完澳洲歸隊，實力大增，即使另一中場占姆士布朗重創緣盡今個賽季，相信可以趁住西悉尼分心踢亞冠盃，繼續進行佢哋嘅搶分之旅。