FC廣州征鹿角鬥入波

猪拉多纳

鐵衞大簡領軍唔識守

亞冠盃今明上演第四輪分組賽，今晚H組有場重頭戲中超廣州恒大淘寶（足智彩譯：FC廣州）作客日職鹿島鹿角。恒大今季喺一代鐵衞簡拿華路領軍下竟變豆腐防線，近期失波頻頻認真失威，好彩巴西貴價兵列卡度高拉特喺前線交到功課。鹿島鹿角頭三輪全敗已經冇嘢再輸，主場出擊料會放膽一搏，兩軍上輪一共炮製了七個入球，今次隨時再演入球騷，再追大盤。

（now 671周二晚6時直播）

今季新接任恒大帥印嘅前意大利國腳簡拿華路再次證明踢波叻唔代表教波叻，原本諗住踢後衞出身嘅大簡可以灌輸更多防守意識畀球員，點知恒大今季失波情況比上季嚴重得多。唔計季初超級盃，恒大今季踢咗七場比賽只有一場保持清白之身，當中近六場加埋失咗十一球，包括對上兩輪分組賽對西悉尼流浪者及鹿島鹿角嘅五個失波，如果唔係巴西外援列卡度高拉特喺頭三輪個人入咗六球，恒大依家點可能以九分高居此組榜首咁輕鬆！
鹿角金崎夢生弗爆

日職代表喺今屆亞冠表現令人失望，除咗柏雷素爾排喺E組次席，其餘三隊大阪飛腳、浦和紅鑽及鹿島鹿角踢完三輪仲未贏過波。鹿島鹿角現時喺呢組三戰全敗排包尾，如果同日FC首爾同西悉尼流浪者分出勝負，鹿島鹿角輸波便會即時出局，主場唔攻仲等幾時？前鋒金崎夢生對上三場聯賽都有士哥，中場土居聖真喺今屆亞冠亦有兩個入球，就算巴西前鋒達維仍有傷，攻力仍有一定保證，今場捧大盤啱數。
武里南聯大起飛腳

另一場直播F組賽事，泰超武里南聯主場迎戰日職大阪飛腳。武里南聯頭三輪分組賽保持不敗以七分排榜首，表現平穩，而且佢哋對上三屆主場對住柏雷素爾、仙台維加泰及大阪櫻花都唔使輸，應付日職球隊有心得。大阪飛腳三戰得一分出線未絕望，球隊近期有復甦迹象，王牌前鋒宇佐美貴史最近兩場聯賽有士哥之餘，代表日本國家隊亦取得處子入球，腳風唔錯，今場同樣捧大盤較穩。

（now 670周二晚7時直播）