QPR反彈雙箭發維

猪拉多纳

土炮護級大作戰！

今晚英超獨腳戲爆發「土炮護級大戰」，由阿士東維拉主場迎戰昆士柏流浪。QPR上仗踢出今季代表作，以4:1大勝西布朗，最重要係「翻生雙箭」森莫亞同查理柯士甸齊齊搵番射門鞋，今晚造訪傷兵唔少嘅維拉，絕對有權搶分而回，QPR受讓平半，撐2.09倍「下盤」。

（now621台周三凌晨2:45直播）

維拉同昆士柏家陣護級形勢都係水深火熱，維拉揸住28分排喺第17，QPR仲大鑊啲，位列尾二，呢場6分波可以話係各有所求。玩季尾波最緊要睇兩軍鬥心，QPR近仗明顯踢得搏命咗，上周六更終於有回報，作客以4:1大炒西布朗，攞到今季第2場作客勝仗之餘，成班波士氣亦大大提升，今鋪好有機會食住個勢再搶分。
森莫亞金球大熱 柯士甸破入球荒

最令QPR領隊基斯藍斯高興嘅，肯定係睇見兩位土炮箭頭終於搵番射門鞋，先講森莫亞，呢位老將上仗喺右路「K角位」嘅靚絕笠射，唔單止係佢近兩個月嚟首個「士哥」，英媒仲話呢球極可能係今季英超金球大熱添！佢嘅前線拍檔查理柯士甸，經過季初一輪爆發、變成紅人後近排沉寂咗落嚟，「土炮之星」嘅光芒亦畀熱刺大將哈利卡尼搶晒，好在，經過一輪調整後，柯士甸上仗終於入番粒，打破連續3仗食白果嘅頹勢。今晚呢對拍檔再度聯手出擊，就算伊度亞度華加斯因傷極可能缺陣，但呢位智利球員腳法粗糙，卡蘭積卡擔番正專心造波，話唔埋森莫亞同查理柯士甸仲易搵食。
維拉三線唔齊腳

冇錯，主隊維拉自舒活接掌後的確係脫胎換骨，一眾本土球員戴爾夫、艾邦拉荷終於踢番應有水準，奈何呢班波嘅質素堅係見晒底，加上回勇嘅英格蘭翼鋒史葛冼佳亞同土炮中場艾殊利韋斯活特又打埋柴，中前場創造力大受削弱。咪忘記維拉仲有右閘侯頓上仗鬥曼聯一戰傷出，經驗豐富嘅李察鄧尼又養緊傷，前中後都唔齊腳，點同反彈嘅QPR鍊呀？
盤路解碼：維拉今季英超主場僅3勝，主勝率20%。

Data King：柯士甸專恰維拉

‧雙方首循環交手，QPR主場贏2:0，柯士甸包辦兩粒。

‧昆士柏流浪係英超唯一作客冇和過波嘅球隊。

‧兩軍近5次交手，入球大細梅花間竹。