FC廣州搏出線 獵鹿打真軍

猪拉多纳

聯賽留力 搞到輸波

飽受傷兵問題困擾嘅廣州恒大淘寶（足智彩譯FC廣州），今日喺亞冠盃H組作客鹿島鹿角，表面睇可勝不穩，但係佢哋上場不惜放棄聯賽，就係為咗要再贏鹿島一鋪提早出線，博恒大小讓平半嘅1.99倍上盤就最穩陣嘞。

（now671台周二晚6:00直播）

恒大上星期响中超客戰輸畀河南建業1:2，令好多人大跌眼鏡，其實大家唔使大驚小怪，嗰場波恒大擺明留力，帶傷嘅隊長鄭智固然冇出，連金英權、于漢超、黃博文同剛啱復出嘅後防大將張琳芃都只係玩咗半場就收工，如果計埋去咗意大利醫腳嘅廖力生，恒大基本上真係半力出擊，輸波有乜出奇？
坐老闆專機提前抵日

無可否認，恒大的確係傷兵滿營，門將曾誠啱啱復操，今場至多做後備，中場阿倫杜格拉斯更加要長抖，搞到恒大今季中場創造力下降，射手高拉特經常要褪番後攞波，不過恒大始終平均質素高過鹿島，尤其攻擊力係對手最忌憚嘅，何況佢哋班主力球員，包括鄭智上星期五已經坐老闆許家印架私人飛機去咗日本，提前適應陰寒嘅天氣，顯然就係想攞埋呢3分率先出線，然後集中火力响中超追趕榜首。
鹿島日職開齋振士氣

對家鹿島開季沉過沉船，但係上星期終於反彈，喺日職主場贏咗鳥棲砂岩3:1打開勝利之門，成班球員信心都返晒嚟。雖然前鋒達維、中場大腦小笠原滿男同時養傷，但鹿島班生牯仔豐川雄太、植田直通以至赤崎秀平、山村和也同埋新進國腳柴崎岳、昌子源都活力過人，今場有主場球迷撐腰，對住防守欠穩嘅恒大，偷到雞入波唔奇怪，所以呢場波嘅投X策略，首選係恒大上盤，至多咪輸半格，唔嫌熱啲嘅，1.7倍入球大都值得一博。