拿玻里散散地 讓波唔啱素

猪拉多纳

意大利盃4強次回合，衞冕嘅拿玻里主場對拉素，雙方上月初首回合打和1比1，可謂旗鼓相當。不過時移世易，拿玻里近期狀態急插水，近4仗只入1球，有傳射手希古恩及教練賓尼迪斯將於今季結束後一齊離隊，嚴重打擊軍心，成班波有啲散散哋。反觀拉素則愈戰愈勇，取得4連勝，今場仲受讓平半，識揀梗係揀下盤！

（now 633周四凌晨2時45分直播）

拿玻里喺意甲跌至第6，進軍明年歐聯嘅機會唔樂觀，令陣中唔少球星萌生離意，特別係首席射手希古恩一直不滿球隊未能打入今屆歐聯分組賽，近日有傳阿仙奴計劃邀請佢加盟，相信呢位阿根廷國腳唔會拒絕去英超搵食。可能受消息影響，希古恩近4仗無心戀戰全交白卷，似乎已準備好離開意甲。至於賓尼迪斯已經不獲會方信任，下台係遲早嘅事，球隊前景未明，肯定打擊士氣，想贏都力不從心。
高路斯領軍 拉素有計

拉素方面，老將高路斯老而彌堅，上仗意甲又入波，加上菲臘安達臣、簡達華、碧基亞亦頻頻有士哥，球隊攻擊力相當強，4連勝共轟入11球，只失1球，可謂攻守兼備。拉素過去6屆意盃兩度捧盃，對於一支中型班而言實屬難能可貴，睇好佢哋今屆可以擊退拿玻里，殺入決賽。