ＦＣ北京硬淨頂到紅鑽

猪拉多纳

今晚亞冠盃續有兩場直播賽事，先講G組日職浦和紅鑽主場迎戰中超ＦＣ北京（北京國安），頭三輪分組賽全敗嘅紅鑽近期演出雖然有起色，但要擊敗今屆防守表現甚佳嘅國安有難度，捧國安可保不敗開讓球客勝。

（now 671周三晚6時30分直播）

紅鑽今季加入唔少新球員，季初明顯仍在適應期，頭三輪分組賽全部輸晒出線危危乎，就算佢哋喺聯賽取得3勝1和，贏波過程都好忟水，未算太有說服力。國安自從去年由西班牙教頭文沙奴接掌後，踢法愈來愈成熟，今季於各項比賽踢咗8場比賽未輸過，當中有7場保持清白之身，防守超硬淨，難得受讓好抵玩。
平陽冇包袱喪攻博「大」霧

另一場直播係E組越南平陽主場鬥南韓全北汽車，平陽3戰全敗失11球，係頭三輪分組賽失波最多嘅隊伍，不過佢哋之前對住柏雷素爾、ＦＣ山東都能取得士哥，今次喺冇心理壓力下料會同全北汽車鬥攻，中位數調至3.5球照捧大。

（now 670周三晚7時直播）