曼城冇態紅魔惡晒

猪拉多纳

打吡大戰又係朗尼Show Time

魔童歸位再做破「城」英雄！今晚英超重頭戲爆發打甩髀嘅曼市打吡，由曼聯坐鎮主場惡鬥「嘈吵鄰居」曼城，紅魔隊長朗尼自復任中鋒後狀態返晒嚟，適逢曼城狀態大跌Watt，正所謂仇人見面分外眼紅，呢位打吡史上頭號射手梗係乘機做番場打落水狗嘅好戲，一雪近年對戰4連敗屈辱，重奪曼市一哥王座，平手盤當然撐曼聯啦！

(now 621周日晚11時直播)
帶動中場全面爆發

曼聯喺2月尾輸畀史雲斯兼有前鋒尹佩斯重創，法卡奧又冇態，主帥尹戈爾無奈之下惟有將朗尼推前出任中鋒，點知無心插柳，終於畀紅魔搵到個食胡陣式，「魔童」近5場聯賽轟入4球帶領球隊贏晒，仲帶動埋桑馬達、費蘭尼、安達靴里拉等中場全面爆發，證明尹帥之前搵佢打中場簡直係嘥料。

儘管箭頭尹佩斯已經傷愈，並主動請戰，但已被尹帥請食檸檬，因為朗尼實在太弗，而且佢對親同市死敵曼城特別起勁，自從04年從愛華頓加盟後，「魔童」喺曼市打吡戰累積11球，位列史上頭號射手，依家踢番中鋒狀態返晒嚟，梗係要食住勢繼續數胡啦！
誓雪對戰4連敗之辱

本來與榜首車路士形成「雙藍之爭」格局嘅曼城，於2月份開始始瘋狂失分，近11場聯賽贏得4場，上仗作客更輸畀水晶宮，令佢哋跌落第4位，王牌射手阿古路上次入波，已經要數到2月中歐聯首回合對巴塞一役，其他前鋒如迪斯高同祖維迪谷極都谷唔起，韋菲特邦尼亦因傷上陣成疑，狀態同士氣可謂低處未算低，就算想喺呢場打吡戰反彈亦有心無力。

賽前朗尼發表激動宣言，話任何時候都會想贏打吡戰，希望曼聯擁躉喺周一朝早，可以有理由狂寸曼城粉絲。雖然雙方嘅前4歐聯席位都幾穩陣，但仇人見面一定打甩髀，況且曼聯之前4次對曼城輸晒，難得「藍月亮」正陷低潮，誓要一雪前恥重做曼市一哥，仲有平手盤咁筍，必捧曼聯。