曼城跌Watt死火 平手撐紅魔

猪拉多纳

今晚英超上演萬眾矚目嘅「曼市打吡」，聯賽5連勝嘅曼聯喺奧脫福迎戰跌晒Watt嘅曼城。曼聯近期狀態弗爆，全靠「天才」尹戈爾唔玩嘢，令安達靴里拉、桑馬達同唔使踢中場嘅朗尼輪流發威。相反曼城近排死火，阿古路連續6場冇貨交，平手盤一於捧1.87倍嘅紅魔啦！
尹佩斯復操未踢得

今季射入10個聯賽入球嘅尹佩斯早前對史雲斯受傷，雖然近排已復操，但都趕唔切今晚上陣。不過問題唔大，事關喺佢缺陣嘅近幾場波，曼聯表現Sharp醒！尹戈爾喺冇乜選擇下反而且踢得正路，朗尼由唔擅長嘅中場位置推番上前鋒，更加如魚得水，之前打入冷宮嘅桑馬達亦大踢爭氣波，令紅魔霸氣再現。

曼城先後喺歐聯、足總盃同聯賽盃出局，喺聯賽嘅表現都唔好得幾多，1月份到依家只拎到5勝3和4負，依家少踢一場下仲比阿仙奴同曼聯爬頭，近況差勁！雖然曼城猛將如雲，近幾年有隊長高柏尼擔大旗嘅「曼市打吡」都未輸過波，對上一次打敗仗已經係2011年嘅事，但至弊高柏尼上場對水晶宮時拉傷腿筋，今晚好大機會缺陣。
高柏尼拉傷或缺陣

王牌射手阿古路雖然今季射入17個聯賽入球，排喺射手榜第3位，但近排表現跌晒Watt，已經連續6場無進帳。既然上場佢哋作客實力差一截嘅水晶宮都輸波，更何況今晚要造訪氣勢如虹嘅曼聯？開平手盤撐紅魔就最好不過啦！
盤路解碼：紅魔今季英超主場16戰13勝，贏波率約81%。

Data King：

‧曼城射手阿古路已連續6場食白果。

‧「藍月亮」作客4連敗。

‧紅魔前鋒朗尼喺「曼市打吡戰」入咗8球，當中得3球喺奧脫福球場士哥。
乜都玩錦囊：博埋紅魔小勝波膽

曼城近排愈踢愈霉，近3仗作客只入得1粒，加上王牌阿古路最近啞火，「藍月亮」真係冇乜數胡本錢。若然佢哋專心死守，紅魔就算贏都唔慌多波入，不妨補多注曼聯小勝「1:0」（8.5倍）、「2:0」波膽（11.5倍）。