黃潛死火冇動力 基達菲搵到食

猪拉多纳

（日）10 基達菲 Vs 維拉利爾

今晚西甲基達菲主場迎戰「黃色潛艇」維拉利爾。計埋前日主場意外大敗畀愛斯賓奴0:3，維拉利爾近6仗未嘗1勝，明顯狀態麻麻。相反主場嘅基達菲依家位列13位，多尾3艾美利亞10分，護級壓力唔算大，加上近期連贏2場，士氣大增，今晚主場出擊至少可保不敗，今仗首選基達菲嘅「讓球主勝」。

基達菲踢法一向硬朗，以防守為主，每次主場出擊球味十足，戰意高昂，今季喺主場曾經守和榜首嘅巴塞隆拿0:0，亦擊敗過第5位嘅西維爾，可見呢支中下游球隊有一定戰鬥力。雖然基達菲季內3次對維拉利爾都係以一球落敗，不過今仗論狀態基達菲係較好嘅一隊，睇吓首席射手艾華路華斯基斯可唔可以幫球隊一雪前恥。
維拉利爾近6仗入得2粒

維拉利爾今季不時踢出悅目嘅地面進攻，就算對皇馬巴塞都有力一戰，但係近期征戰過於頻密，導致近6仗未嘗1勝，只係入過2球咁大把，以一支攻強於守嘅球隊嚟講，極唔尋常。前線新星韋圖同杜斯山度士確實有一定質素，不過近幾仗明顯疲態盡現，埋門自然失之交臂，今晚係3日內嘅第2場比賽，對住爛打嘅基達菲防線，隨時又交白卷。