紅魔舊拍檔對台鬥數胡

猪拉多纳

世界真細小，兩位前曼聯鋒線拍檔泰維斯同貝碧托夫，今仗各為其主；「野獸」泰維斯16強對多蒙特，兩回合都有波入，「Hea碧」貝碧托夫亦作客攻陷阿仙奴大門，成為晉級功臣。兩位前紅魔鬼大鬥法，勢必成為勝負最大關鍵。

泰維斯同貝碧托夫曾於08/09年球季為曼聯奪得英超及世冠盃，其後泰維斯轉投曼城，各自各精彩。10/11年球季泰維斯以20個入球，同留守曼聯嘅貝碧托夫並列英超神射手，互相輝映，再次證明兩位都係世界頂級前鋒。
泰維斯多產 「Hea碧」專入金球

雖然兩人最終都無奈離開英超，分別去到意甲同法甲發展，但並未撲滅二人心中一團火。泰維斯今季暫時為祖雲達斯於意甲轟入17球，高踞射手榜一哥，腳風順到不得了。「Hea碧」雖然唔算多產，但喺法甲不時射入金球。由於泰維斯一直打算重返阿甲養老，貝碧托夫亦已年屆34歲，今次歐聯可能成為雙方最後一次巔峰對決，各位球迷切勿錯過。