馬體會打吡魔法王 再恰皇馬

猪拉多纳

今晚歐聯8強重頭戲，當然係「馬德里打吡」！呢場波係上屆決賽翻版，雖然皇馬上屆封王，不過睇番兩軍近8次對賽，馬德里體育會每次都頂得住皇馬，90分鐘內從未輸過波，可見「床單」教頭、「打吡魔法王」施蒙尼嘅鐵血防守，往往都剋死皇馬！今晚首回合馬體會仲有主場之利兼受讓添，一於熱熱哋，捧1.5倍「讓主」啦！

（有線61、64、201及203、中央5台周三凌晨2:45直播）
近6次對賽 馬體會4勝2和

馬體會上季雖然喺西甲封王，但佢哋喺球迷心目中嘅地位，始終唔及巴塞同皇馬。但睇番數據，查實馬體會過去一年對住皇馬都係佔盡上風，兩軍今季喺西甲、西盃同西超盃6次對賽，馬體會竟然攞到4勝2和嘅一面倒優勢，連皇馬最引以為傲嘅「BBC」喪攻組合（巴利＋賓施馬＋C朗），喺呢6場波入面，都只係得C朗入過兩球波，可以話係完全畀馬體會食住。

咁又難怪嘅，防中出身嘅馬體會教頭施蒙尼，佢教班手足防守的確好勁，硬朗中帶啲茅又好少食牌嘅踢法，成功阻止對方唔少攻勢。你睇馬體會今屆喺歐聯4次主場全部贏晒、總共入咗11球兼1球波都冇失過，連火力強大嘅祖雲達斯同利華古遜呢啲硬嘢，去到馬體會地頭都冇晒符，咁大家就知「魔術施」有幾堅啦！誇張啲講，馬體會每逢喺主場出擊，基本上等於立不敗之地！
皇馬跌Watt遇硬嘢例衰

仲有，皇馬上個月狀態突然下滑，依家喺西甲已經畀巴塞過咗頭，雖然近期喺C朗帶動下打番起個勢，不過佢哋面對硬嘢嘅能力，始終令人懷疑。你睇16強次回合3:4輸畀史浩克04嗰場波，見佢哋後防錯漏百出就知啦！睇埋「銀河艦隊」上月底畀巴塞技術性擊倒嗰場波，就進一步證明佢哋抵受唔住強隊壓力，今晚造訪馬體會，睇嚟失利都係在所難免喇。
頂占筍盤：馬德里體育會（讓球主勝）

歐聯賽制：採主客兩回合制，現為8強首回合。兩回合計打和計作客入球優惠，未分勝負則於次回合後加時，加時階段仍計作客入球優惠，再和則互射12碼。

乜都玩錦囊：吼埋「床單」第一隊入球

馬體會近6次出戰「馬德里打吡」冇輸過，今場有得受讓，「讓主」當然要吼實。但想博好分頭嘅話，就不妨揀馬體會2.04倍「第一隊入球」，翻睇往績，佢哋近5次都能夠率先攻破皇馬大門，今場再入波先一啲都唔奇。
Data King：皇馬作客旺半和

‧馬體會過往4次歐洲賽鬥皇馬，每場都入1粒。

‧馬體會喺歐洲賽主場對西班牙球會未輸過，6戰5勝1和。

‧皇馬近9場作客開出6次「半場和」。